«Барселона» ҳимоячиси Карлес Пуйол мавсум охирида жамоадан кетишини эълон қилди. Бу ҳақда футболчи махсус матбуот анжуманида эълон қилди.

Карлес фаолиятини «Барселона»да бошлаган ва илк марта 1999 йил майдонга тушган. Жамоа таркибида олти марта Испания чемпиони, уч марта чемпионлар лигаси, икки мартадан мамлакат кубоги ва УЕФА суперкубоги ғолиби бўлган.

«Жароҳатдан кейин тиззамнинг тикланиши кутилганидан оғирроқ бўлди. Жароҳат ва икки операциядан кейин аввалги даражада ўйнай олмаяпман. Лекин бу билан футболдан бугун кетаман демоқчи эмасман. Олдинда яна 3 ой бор ва мавсум охиригача бор куч билан ўйнайман.

Биз клуб билан келишиб олдик. Яна икки йилга мўлжалланган шартнома икки томоннинг келишувига кўра бекор қилинади. Кейинчалик нима қилишимни ҳозирча билмайман. Аввал дам олиш керак, кейин кўрамиз», – дейди Пуйол.