Матбуот анжуманининг иккинчи қисмида Миржалол Қосимов саволларга жавоб берди.

— Қизиқарли ўйин бўлди. Икки рақиб ҳам бир-бирини жуда яхши биларди. Ўйиннинг темпи ҳам зўр бўлди. Мухлисларга ёқди деб ўйлайман. Жамоалар ҳали максимал ҳолатга чиқишгани йўқ. Шунинг учун ўйин охирида футболчиларда чарчоқ аломатлари сезилди.

– «Бунёдкор» иккинчи бўлимда устунликни бериб қўйди. Бу режада бор эдими?
– Бу психологик ўйин бўлди. Албатта, иккинчи голни ургандан кейин шундай ўйнадик.

– Карлес Кото нима учун охиригача ўйнамади?
– У энди жамоага келиб қўшилди. Чемпионат ўйинлари давомида ўзини кўрсатиши керак.

– Лутфулла Тўраев ҳамда Жасур Ҳасанов каби футболчиларнинг кетгани сизни ўйлантирлантирмаяптими?
– Алмаштириб бўлмайдиган футболчи бўлмайди.

– Рақибнинг қайси чизиғи сизнингча яхши ўйнади?
– Бир нарса дейиш қийин. Уларнинг ҳар бир чизиғида яхши футболчилар жамланган.

– Одатда «Бунёдкор» иккита ҳужумчи билан ўйнамас эди. Бугун шундай бўлди. Бундан кейин ҳам шундай бўладими?
– Тактика ўйиндан келиб чиқиб танланади. Менда яхши ҳужумчилар кўп ва шунинг учун иккита ҳужумчи билан ўйнадик.

– Сардор Собирхўжаев қандай ўйнади? Ўйиннинг «Жар»да бўлиши сизларга устунлик бердими?
– Сардорни 5 ёшидан биламан. У жуда яхши ўйин кўрсатди. Мен унга ишонаман ва хатоларини тузатаман. Унга Одил Аҳмедовни намуна қилиб кўрсатаман. Стадионнинг эса фарқи йўқ.

– «Бунёдкор» 11 март куни қаерда ўйнайди?
– Биз «Пахтакор» стадионида ўйнашимиз мумкин. Малайзияга шу юзасидан хат юбордик. Агар рухсат беришса, «Пахтакор»да ўйнаймиз.