Биринчи ўйинда "Атлетико" Миландан кичик ҳисобдаги ғалаба билан қайтган бўлса-да, бу натижа ҳали чорак финал йўлланмасини кафолатламасди. "Милан"да ҳали имконият бор эди.

Ўйин эса "Атлетико"нинг тезкор голи билан бошланди. Коке ўнг қанотда тўни қабул қилиб олиб, жарима майдончаси томон яқинлашиб борди ва тўпни юмшоқ тарзда дарвозанинг олис устуни томон узатди. "Милан" ҳимоячилари Диего Костани ёлғиз қолдиришди. У эса йиқилаётиб Аббьяти дарвозасини ишғол қилди.

Деярли барча нарса ҳал бўлди, деб ўйлашди шекилли, мезбонлар бироз бўшашишди. Натижада, ярим ҳимоячи Поли тўпни ўнг қанотда қабул қилиб олди ва чиройли тарзда уни олис устун томонга узатди. Кака эса ҳеч қандай муаммосиз бош билан дарвозани ишғол қилди. Куртуа ушбу зарба олдида ожиз эди.

Ушбу гол ўйинга интригани қайтарди. Аммо мезбонлар бошқа бундай хатони такрорлашмади. Аксинча, бундан кейин гол фақат миланликлар дарвозасига урилди. Аввалига (40-дақиқа) Арда Туроннинг зарбаси Одил Рамининг оёғига тегиб, рекошет ҳолатида Аббьяти дарвозасига бориб тушди.

Ўйин тугашига 18 дақиқа қолганида "Атлетико" ўйин масаласини бутунлай ҳал қилди.  Рауль Гарсия "стандарт"дан жарима майдончасига етказиб берилган тўпни бош билан дарвозага тўғрилаб қўйди. Ўйин тугашига 5 дақиқа қолганида Диего Коста жамоадошининг оёғидан тўпни олиб қўйдию, ўткир бурчак остида дарвозабон билан бирга-бир вазиятга чиқиб, олис устунни нишонга олди. Тўп эса устун орқали тўрга бориб тушди.

Ўйин голларга бой бўлди. "Милан" таваккал қилди, аммо эплай олмади. Ҳозирги "Милан" билан бирорта сенсацияни амалга ошириш қийинлиги кўриниб қолди. Шу тариқа, Италиянинг сўнгги вакили Чемпионлар лигасини тарк этди.

ЕЧЛ, Нимчорак финал, жавоб учрашуви
"Атлетико" - "Милан" - 4:1
Голлар: 1:0 – 3 Коста, 1:1 – 27 Кака, 2:1 – 40 Туран, 3:1 – 71 Р. Гарсия, 4:1 – 85 Коста.
Атлетико – Куртуа, Хуанфран, Миранда, Годин, Филипе Луис, Габи, М. Суарес, Туран (К. Родригес, 78), Р. Гарсия (Соса, 72), Коке (Диего, 81), Коста.
Милан – Аббьяти, Абате, Рами, Бонера, Эмануэлсон, Н. де Йонг (Мунтари, 78), Эссьен (Паццини, 68), Таарабт (Робиньо, 46), Поли, Кака, Балотелли.
Огоҳлантиришлар: Р. Гарсия (5), Рами (7), Балотелли (45), Бонера (70), Робиньо (74).
Биринчи ўйин - 1:0