“Андижон” ҳамда “Пахтакор” жамоалари ўртасидаги ўйиндан кейин ўтказилган матбуот анжуманинг иккинчи қисмида мезбонлар бош мураббийи Азамат Абдураимов журналистларнинг саволларига жавоб берди.

— Чемпионатнинг очилиш учрашуви бўлгани боис бу биз учун ҳақиқий байрам эди. “Андижон”да ишлаётганимдан бери бугун стадион мухлислар билан тўлиб тошганини кўрдим. Бугун ишқибозлар бизни жуда яхши қўллаб-қувватлашди. Бу борада андижонликлар мамлакатимиздаги биринчи рақамли фанатлар дея оламан. Футболни анча соғиниб қолган мухлисларимизга ғалабани тақдим этмоқчи эдик. Гарчи ютқазган бўлсак-да, ўйиндан кейин кийиниш хонасига кириб шогирдларимга эътирозим йўқлигини айтдим. Бугун ёмон ўйин кўрсатганимиз йўқ. Фақат айрим вазиятларда рақибларимиздан биздан устунлик қилишди. Афсуски, имкониятлардан фойдалана олмадик. Ўйин бошидаёқ ҳисобни очишимиз мумкин эди. Лекин буни голга айлантира билмадик. Иккала жамоа учун ҳам ўйин осон ўтмади. Бундай учрашувларда ўйин тақдирини битта гол ҳал қилади. Мавсум энди бошланди ва ўйлайманки, олдинда ҳали бизнинг ғалабаларимиз кўп. Асосийси, футболчилар ўз характерларини кўрсатишди. Тажрибали “Пахтакор” билан тенг-тенг ўйнашди.