"Ливерпуль" сардори Стивер Жеррард белгиланган 3та пенальтининг 2тасини голга айлантирди, Суарес битта гол урди ва "мерсисайдликлар"га "Олд Траффорд"дан 3 очко билан қайтишди.

Учрашув бош ҳаками Марк Клатенбург мезбонлар дарвозасига 2та пенальти белгилашдан тортинмади. Дастлаб Суарес тўпни "МЮ" футболчиси Рафаэль ёнидан олиб ўтаётганида, ҳимоячи тўпни қўли билан қайтариб қолди. Иккинчи вазиятда эса Жонс жарима майдончаси ичида тўп учун курашда Алленга нисбатан секинроқ ҳаракат қилди ва ҳужумчини ортидан итариб йиқитди. Ҳар иккала пенальтини Жерард битта томонга — биттасини баландлатиб, биттасини ерлатиб, дарвозага тўрига жойлади.

Дарвоқе, Жеррард учинчи пенальтини ҳам голга айлантириши мумкин эди. Неманья Видич ўзидан ўтиб кетаётган "Ливерпуль" ҳужумчиси Старриж оёғи остига ташланди. Вазият такроран намойиш қилинганда контакт борга ўхшади, аммо Даниэль пенальти ишлаш учун ҳаракат қилганга ҳам ўхшади. Ушбу вазият учун Видичга сариқ карточка кўрсатилди. Бу унинг ўйиндаги иккинчи сариқ карточкаси бўлди ва Неманья майдонни эрта тарк этди. Пенальтини эса "СтивиЖи" бу сафар тўпни қарама-қарши бурчакка ерлатиб йўллаган зарбаси дарвоза устунига тегиб қайтди.

Ўйинни юқори савияда ўтказган Луис Суарес баҳс тугашига 6 дақиқа қолганида дарвозабон билан юзма-юз қолди ва ўз имкониятидан оқилона фойдалана олди (2 дақиқа олдин шунга ўхшаш вазиятдан гол ура олмаган эди).

Тан олиш керак, "Манчестер Юнайтед" яхши ўйин намойиш қила олмади. Бу кеча "Ливерпуль" ғалабага кўпроқ интилди, курашди. Натижада ливерпулликлар чемпионлик учун курашни давом эттирадиган бўлишди. "МЮ" эса еврокубоклар учун курашиш имкониятини янада пасайтирди.

АПЛ, 30-тур
Манчестер Юнайтед – Ливерпуль 0:3 (0:1)
Голлар: 0:1 – 34, пенальти Жеррард, 0:2 – 46, пенальти Жеррард, 0:3 – 84 Суарес.
Манчестер Юнайтед – Де Хеа, Рафаэл, Видич, Джонс, Эвра, Феллайни (Клеверли, 76), Кэррик, Мата (Рио Фердинанд, 87), Руни, Янузай (Уэлбек, 76), ван Перси.
Ливерпуль – Миньоле, Жонсон, Шкртел, Аггер, Фланаган, Аллен, Жеррард (Лукас, 86), Хендерсон, Старриж (Аспас, 90), Суарес, Стерлинг (Коутиньо, 72).
Огоҳлантиришлар: Фланаган (31), Рафаэл (32), Жеррард (37), Шкртел (54), Видич (71).
Четлатиш: Видич (77).