Жозе Моуриньо яна Арсен Венгерни тинч қўймаяпти. Кеча "Челси" устози бугун бўлиб ўтадиган баҳсда "Арсенал"даги ҳамкасбининг юбилей - 1000-ўйинини ўтказиши муносабати билан шундай деганди:

"Мен Венгерга ҳам, "Арсенал"га ҳам тасанно айтаман! Клуб ўз мураббийини омадсиз вақтларида ҳам қўллаб-қувватлаб келмоқда, ваҳоланки бундай вақтлар жуда кўп бўлган".

Бунга Арсен Венгернинг жавоби ESPN'да чоп этилган.

"Ишда мен ўз клубим шаънини ҳимоя қиламан, ўзимнинг эмас. Шу боис доим клуб қадриятларига ҳурмат билан ёндашганман. Ўз шахсий ҳисларимни ишга аралаштирмайман. Чунки жамоага ҳақиқий устунликни фақат майдондаги ҳаракатлари олиб келади. Матбуот анжуманлари билан боғлиқ вазиятни тушунаман, лекин энг муҳими - ўйин. У эса майдонда бўлади", - дейди рақибига нисбатан ортиқча сўз ишлатишни лозим топмаган Венгер.