"Арсенал" бош мураббийи Арсен Венгер АПЛнинг қолдирилган ўйинида "Суонси" билан дуранг қайд этилгач (2:2), жамоасининг медаллар учун курашдаги имкониятларига баҳо берди.
"Катта ташвиш чекишга ҳожат йўқ деб ўйлайман. Шунчаки, реалист бўлиш ва олдиндаги баҳсларда ғалаба қозонишга ҳаракат қилиш керак холос. Биз нафақат ўзимиздан ортда қолаётган жамоалардан, балки етакчилардан ҳам кўз узмаслигимиз лозим.
Кучли тўртликка кириш учун имкониятимиз қандай? "Эвертон" ғалаба қозонди, шунинг учун биз кейинги баҳсга катта эътибор қаратишимиз керак. ЕЧЛ йўлланмаларини берувчи ўринлар учун кураш охиригача давом этади, бу йўлда баъзи сюрпризларга ҳам дуч келишимиз мумкин.
"Ман Сити" бугун яхши натижага эришди. Уларни тўхтатиб бўлмайдигандек кўриняпти. Улар - фаворитлар, ахир ҳисобларида яна иккита захира ўйинлари бор. "Сити" ва "Челси" - бош соврин учун асосий даъвогарлар. Бизнинг эса чемпионлик пойгасига қайтиш учун имкониятларимиз кўп эмас. Ҳали таркибдаги кўплаб ўйинчилар қайтишлари керак. Ярим жамоа майдонга туша олмайдиган бўлиб турганда совринлар учун курашиш - қийин иш", - деди француз мутахассиси.