4 апрель куни Ўзбекистон футбол федерациясида навбатдаги Ижроқўм йиғилиши бўлиб ўтди. Унда бир нечта ташкилий масалалар кўриб чиқилди. Ижроқўмда иштирок этган Терма жамоалар маркази директори Асқар Толибжонов билан ЎФФ матбуот хизмати суҳбат уюштирди.

— Дарҳақиқатан, 4 апрель куни Федерация Ижроқўм йиғилиши бўлиб ўтди. Унда бир нечта масалалар кўриб чиқилди. 2014 йилда ўз фаолиятини олиб борадиган ва нуфузли мусобақада иштирок этадиган терма жамоалар бош мураббийларини тасдиқлаш, уларнинг 2014 йилга мўлжалланган иш режаларини қайтадан кўриб чиқиб, қайтадан тасдиқлаш масаласи ҳамда, энг муҳим масала — Миржалол Қосимовнинг фақат миллий терма жамоада ишлаш масаласини кўриб чиқиш масалалари кўриб чиқилди. Ижроқўмнинг қарорига кўра, Миржалол Қосимов апрель ойидан бошлаб "Бунёдкор"дан кетадиган ва фақатгина миллий терма жамоада фаолият олиб борадиган бўлди. Қосимов терма жамоанинг 2014 йилги иш режасини ишлаб чиқиб, Федерацияга тақдим этиши лозим. Миржалол Қосимов ноябрь ойида Жанубий Кореянинг Инчеон шаҳрида бўлиб ўтадиган Осиё Ўйинлари ва келаси йили январь ойида Австралияда ўтадиган Осиё кубоги мусобақаларида иштирок этадиган терма жамоаларимизга бошчилик қилади.

Осиё Ўйинларида терма жамоамиз олдига 20 йил аввалги натижани такрорлаш — олтин медалларни қўлга киритиш вазифаси қўйилди. Хабарингиз бор, Миржалол Қосимов 1994 йилги Осиё Ўйинларида футболчи сифатида чемпионликни қўлга киритган. Қосимов олдига қўйилган иккинчи вазифа — Осиё кубогида муваффақиятли иштирок этишдан иборат.

Терма жамоаларимиз ушбу мусобақаларга яхши тайёргарлик кўриши учун терма жамоалар маркази томонидан уларга етарли шароитлар яратиб берилади. Терма жамоаларнинг иш режаси доирасида ўқув-машғулот йиғинлари ва ўртоқлик учрашувлари ташкил этилади. Осиё кубоги-2015га қуръа ташлаш жараёнида б из нафақат гуруҳимиздаги рақибларни аниқлаб олдик, балки қуръа маросимига ташриф буюрган бир қанча терма жамоалар масъуллари билан ўртоқлик учрашувини ташкил қилиш бўйича музокаралар олиб бордик. Осиё кубоги бошлангунига қадар терма жамоамиз 6-7та халқаро ўртоқлик ўйинларида майдонга тушиши лозим. Уларнинг бир нечтаси Ўзбекистонда ўтказилса, бир нечтаси хориж йиғинлари доирасида ташкил этилади. Режамизга кўра, май ойида Тошкентда 2та ўйин ўтказамиз. Сентябрда Иордания терма жамоаси билан ўзимизда ўртоқлик ўйинида ўтказиш бўйича келишувга эришганмиз. Октябрь ойида эса 3та ўртоқлик учрашувида иштирок этамиз. Булар — 6 октябрь Қатар, 10 октябрда Баҳрайн ва 14 октябрда Уммон терма жамоалари билан баҳсларда иштирок этамиз. Шунингдек, 20-25 декабрь кунлари оралиғида ўртоқлик ўйинини ўтказиш бўйича музокаралар якунига етган. Шунингдек, Осиё кубоги бошланишида аввал, 5 январь куни ўртоқлик ўйини режалаштирилган. Шунингдек, турли йиғинлар ҳам режалаштирилган ва буларнинг барчаси амалга оширилади.

— Тўғри тушунган бўлсам, терма жамоамз олдига Инчеонда ўтадиган Осиё ўйинларида чемпион бўлиш вазифаси қўйилган. Шундайми?
— Ҳа, шундай. Бу вазифа бежизга қўйилмади. Боиси, 20 йил аввал биз бу вазифани уддалаганмиз. Ушбу мусобақада 1991 йил ва ундан кейин туғилган футболчилар иштирок этади. Терма жамоамизнинг кенгайтирилган рўйхатидан футболчиларнинг аксарияти мана шу ёш тоифасига тўғри келади. Шунингдек, Осиё Ўйинларида ёши 23дан катта бўлган яна 3 нафар футболчини ҳам таркибга киритилиши мумкин.

— Яна бир ҳолатга аниқлик киритишингизни сўрайман. Инчеонга Шуҳрат Мақсудов бошчилигидаги терма жамоа эмас, Миржалол Қосимов бошчилигидаги умуман бошқа жамоа боради.
— Бир ҳолатга аниқлик киритиб ўтишим лозим. Шуҳрат Мақсудов 1993 йилда туғилган футболчилардан иборат Ўзбекистон U22 терма жамоасини Осиё чемпионатининг саралаш босқичи ўйинларига тайёрламоқда. Мақсудов ўз жамоаси билан саралашдан муваффақиятли ўтиб, қитъа чемпионати йўлланмасини қўлга киритиши лозим. Миржалол Қосимов эса 1991 йилда ва ундан кейин  туғилган футболчилар билан Осиё ўйинларида иштирок этади. Бу жамоага миллий терма жамоанинг базаси сифатида қаралади ва Инчеондаги турнирда иштирок этади.

— Бизнингча, бу тўғри қарор. Ўзбекистон ўсмирлар ва ёшлар терма жамоалари сафида ЖЧларида иштирок этган футболчилар энди миллий терма жамоага қўшлииб кетишида Осиё ўйинлари мусобақаси муҳим аҳамиятга эга.
— Гапингизда жон бор. Қосимов олдига терма жамоани ёшартириш масаласи ҳам қўйилган. Шу мақсадда кенгайтирилган рўйхатнинг аксарият қисмини ёш футболчилар ташкил этади. Бу футболчиларнинг аксарият қисми Олий лига клубларида фаолият олиб боришади. Албатта, хориж клубларида ўйнаётган легионерларимизнинг баъзилари ҳам янгиланадиган терма жамоада ўз ўринларини сақлаб қолишади. Бу ёшлар Осий Ўйинларида ўз тажрибаларини ошириб, аксарияти Австралияда ўтадиган Осиё кубогида ҳам иштирок этади. Мана шундай мусобақаларда эгаллаган тажриба кейинчалик бошқа мусобақаларда футболчиларимизга албатта ас қотади.