"Атлетико" бош мураббийи Диего Симеоне Чемпионлар лигаси чорак финали жавоб ўйинида "Барселона" устидан қозонилган ғалабадан (1:0) сўнг фикрлари билан ўртоқлашди.

"Бой тарихга эга буюк клуб устидан қизонилган ғалаба катта қувонч келтиради. Аммо биз буни совуққонлик билан қабул қиламиз, чунки бу ҳали ҳаммаси эмас. Тезроқ тикланишга ҳаракат қиламиз, чунки якшанба куни бизни бошқа ўйин кутиб турибди.

Дастлабки 20 дақиқа биз учун жуда яхши кечди. Майдонга яхши кайфият билан чиқдик, аъло ҳаракатлар бажардик ва умуман яхши ўйин кўрсатдик. Кейин "Барса" ўйинга қўшила бошлади ва вазиятлар содир эта бошлади. Шунинг учун бироз қийналдик.

Менинг футболчиларимни руҳлантириш учун уларга бирон нарса дейиш шарт эмас. Уларга бошқа гарса керак: ишонч, қатъият, ўйинга бор маҳоратини бағишлаш. Футболчиларим бу ҳислатларнинг барчаси бор.

Мен ўз футболчиларимдан фахрланаман, уларнинг жонбозликлари ва бир жамоа бўлиб ҳаракат қилишдаридан фахрланаман", - дея Симеоненинг сўзларини келтиради УЕФА расмий сайти.