10 апрель куни Тошкентда 1997-98 йилларда таввлуд топган йигит ва қизлар ўртасида Ўзбекистон чемпионати бошланди. Мусобақа Бутунжаҳон енгил атлетика кунига бағишлангани эътиборга молик.
Чемпионатнинг тантанали очилиш маросими Медицина академияси стадионида бўлиб ўтди. Мамлакатимизнинг турли вилоятлари ва Тошкент шаҳри спортчиларини Ўзбекистон енгил атлетика федерацияси Бош котиби Евгений Нуждин янги мавсум бошланиши билан самимий қутлади:
- 2014 йил мобайнида айнан сизларнинг тенгдошларингиз орасида бир қатор нуфузли мусобақалар ташкил этилади. Бошланаётган чемпионат 20-22 май кунлари Таиландда ўтказилажак Осиё чемпионатига ўзига хос кўприк вазифасини ўтайди. Қитъада ғолиб ва совриндор бўлганлар 16-28 августда Хитойда ўсмирлар олимпия ўйинларида омадларини синаб кўриш имконига эга бўлишади. Хуллас, юксак чўққиларни забт этиш йўлида барчангизга муваффақият ва омад тилайман!
Ўсмирлар ўртасида Ўзбекистон чемпионатида 246 спортчи баҳс олиб боради. Афсуски, улар орасида Навоий вилояти ва Қорақалпоғистон енгил атлетикачилари йўқ. Мусобақа уч кун давом этади.
Омонбой Тўхтамирзаев
