Сўнгги пайтларда «Олтин тўп»нинг 4 карра соҳиби Лионел Мессининг омадсиз учрашувлари кўп мулоҳазаларга сабаб бўлмоқда. Албатта, ҳар бир футболчининг ҳаётида омадсиз даврлар учраб туради. Бутун футболчилик фаолиятини юқори темпда ўтказиш осон эмас. Лео Мессининг рекордлари, ютуқлари ҳақидаги бир қатор мақолаларни ўқигансиз албатта. Бу сафар эса сизга «ўзга сайёралик» футболчининг 5 та омадсизлиги ҳақидаги мақолани ҳавола қиламиз. Аргентиналик футболчининг ашаддий мухлислари мени «антимессичи»га чиқармайсизлар эдган умиддаман.
1. Терма жамоадаги омадсиз дебют
«Барселона» сафида дебютини нишонлаганидан атиги 2,5 ой ўтгач, 18 ёшли Месси Аргентина терма жамоаси сафидаги дебютини ҳам ўтказди. 2005 йилнинг августида Венгрияга қарши кечган ўртоқлик учрашувида 63-дақиқада захирадан майдонга тушган Лео атиги 47 сониядан сўнг (!) ортга қайтди. Яъни ҳакам рақиби – Вилмош Ванчек юзига тарсаки билан зарба берган ёш юлдузни аяб ўтирмайди. Дебют ўйини «қизил»га бурканди. Бироқ, Месси шундан сўнг «синиб» қолмади ва терма жамоада бир қатор ёрқин ўйинларни ҳам ўтказди.
2. Президентнинг қизига берилмаган дастхат
2011 йилнинг октабрида Аргентина терма жамоаси ЖЧ-2014 саралаши доирасида кутилмаганда ўз тарихида илк бора Венесуэлага ютқазиб қўйишади. Натижада Месси жамоадошлари майдонни «хира» кайфиятда тарк этишди. Уларнинг ортларидан Венесуэла президенти Уго Чавеснинг қизи Росина ҳам югуриб борди. У Леодан дастхат олишни хоҳлаган эди. Бироқ Месси шошилаётганини баҳона қилиб, қизнинг илтимосини ерда қолдирди. Ўшанда ҳужумчи ҳаттоки, жамоа автобусини ҳам кутмай, аэропортга шахсий автомобилида йўл олганди.
3. Қўл билан урилган гол
2007 йилда Испания примеросининг навбатдаги мавсуми финишига 2 тур қолганида «Барселона» «Каталония дербиси»да «Эспаньол» билан ўйнади. Муайян натижа қайд этилган тақдирда, Месси ва жамоа соврин йўлида курашни давом эттирарди. Биринчи бўлим охирида Лео ҳисобни тенглаштирди. Бироқ ўнг қанотдан узатилган тўпни дарвозага йўллашда қўлини ишга солди. «Эспаньол» вакилларининг адолат сўраб қилган айюҳаннослари зое кетди: ҳакам голни инобатга олди. Қолган вақт давомида Месси яна бир марта муваффақият қозонди, бироқ «кўк-анорранглилар» охирги дақиқада ғалабани қўлдан чиқаришди, шунинг баробарида чемпионлик пойгасида яхши имкониятни ҳам.
4. Футболчининг белига тупуриш
2008 йилнинг ноябрида «Малага»га қарши учрашувда Мессини андалусияликларнинг энг тажрибали футболчиси Дуда алоҳида таъқиб остига олди. Бироқ барибир ўша ўйинда Лео гол киритишни уддасидан чиққан эди. Ўйиндаги ўзига хос «олишувлар»да футболчилар бир неча марта тўқнашиб кетишди ва ерга тенг йиқилган ҳолатлар ҳам кўп кузатилди. Шундай вазиятларнинг бирида Месси ўрнидан оҳиста турганча рақибининг белига тупуришга жазм этди.
5. Стаматологга боришга мажбур бўлган Майкон
2010 йили «Интер» ва «Барселона» ўртасида кечган Чемпионлар лигаси ярим финалининг илк ўйинида Месси ортиқча ҳаракатга берилиши билан эсда қолди. Иккинчи бўлимда тўп учун курашга киришган «аламзада» Лео ҳимоячи Майконнинг юзига пешонаси билан урилади. Натижада бразилиялик анчагача ўзига кела олмайди ва захира вакили билан алмаштирилади. Майдон четидаёқ Майконнинг олд тишлари камайгани ойдинлашди.
Юсупов Фурқат
