"Барселона" яна бир қийин ғалабани қўлга киритди. "Вильрреал" ўйин давомида 2:0 ҳисобида олдинда бораётиб, ғалабани сақлаб қола олмади.

Каталонияликлар ушбу ўйин орқали жиддий муаммоларга эга эканини яна бир марта намойиш қилди. Биринчи бўлим давомида жамоа тўпни назорат қилиш кўрсаткичини 76-26%гача олиб чиқди, аммо бўлим сўнггида мезбонларнинг 2та жиддий ҳужумини ўтказиб юборди ва улардан бири гол билан якунланди. Хонатоннинг пасидан кейин Кани дарвозабон билан бирга-бир вазиятга чиқиб, тўпни Пинтонинг ёнидан ўтказганча ҳисобни очди.

"Сариқ сувости кемаси" "Барса"ни "чўктириш" учун битта гол камлик қилишини сезди шекилли, иккинчи бўлим бошида иккинчи голни уриб, каталонияликларни шокка туширди. Акинонинг ажойиб пасидан кейин Тригерос 10 метрлардан бош билан тўпни дарвозага жойлаб қўйди - 2:0!

Шундан кейин "Барселона" ўз ҳужумларида тезликни оширди. Ўзи ҳам шошиб ҳаракат қила бошлади. Натижа мезбон ҳимоячилари ҳам шошиб қолишди ва иккита автогол муаллифларига айланишди. Дастлаб Педронинг зарбасидан сўнг тўп ҳимоячилар оёғига тегиб, икки марта ўз йўналишини ўзгартирди ва дарвоза тўрига бориб тушди. Орадан кўп ўтмасдан Алвес ўнг қанотдан тўпни баландлатиб етказиб берган тўпни Мусаччио оддий вазиятда майдон ташқарисига чиқариб юборишни мақсад қилиб, бош билан ўз дарвозасига киритиб юборди.

"Вильярреал" футболчилари ўзларига келиб улгурмасдан учинчи хатога йўл қўйишди. Ҳимоячилар тўпни бош билан қайтаришди, бироқ тўп Мессига келиб тушди. Лео эса 11 метрли нуқта атрофидан зарба бериб, дарвозани ишғол қилди.

"Барселона" жудаям қийин ғалабани қўлга киритди. Бунда майдон эгалари ҳам автоголлар орқали каталонияликларга ёрдам бериб юборишди.  "Барселона" Ла лига соврини учун курашда "Реал" ва "Атлетико"ни таъқиб қилишда давом этади.

Испания чемпионати, 35-тур
"Вильярреал" – "Барселона" - 2:3 (1:0)
Голлар: 1:0 – 45 Кани, 2:0 – 55 Тригерос, 2:1 – 65, автогол Габриэл, 2:2 – 78, автогол Мусаккьо, 2:3 – 83 Месси.
"Вильярреал": Асенхо, Марио, Мусаккьо, Габриэл, Йокич, Б.Сориано, Тригерос, Пина (Акино, 35), дос Сантос (Икечукву Уче, 82), Пербе (Х. Перейра, 14), Кани.
"Барселона": Хосе Пинто, Дани Алвес, Бартра, Маскерано, Адриано, Бускетс, Хави (Тельо, 62), Иньеста, Санчес (Фабрегас, 62), Месси, Педро (С.Роберто, 90).
Огоҳлантиришлар: Санчес (50), Марио (56), Бускетс (85), Тригерос (89), Кани (90), Дани Алвес (90).