“Локомотив” ва “Андижон” жамоалари ўртасидаги ўйиндан кейинги матбуот анжуманида дастлаб меҳмонлар бош мураббийи Азамат Абдураимов иштирок этди.

— Ишончли ғалаба билан “Локомотив”ни табриклайман. Бизнинг ўйинимиз эса бугун чиқмади. Рақибимиз эса чемпионларга хос ўйин кўрсатди. Ҳозирги кунда “Андижон” футболчилари савияси бўйича кучсизроқ. Биз мезбонларга яхши қаршилик кўрсатдик. Аммо сўнгги 20 дақиқада ўйинимиз сочилиб кетди ва мажбурий бўлмаган 2та гол ўтказиб юбордик.

— “Сўғдиёна” бош мураббийи ўз жамоасининг ҳали ғалабага эришмаганини молиявий муаммолар билан изоҳлади. “Андижон”да бундай муаммо йўқми?
— Ёмон раққосга ҳамиша нимадир халал беради. Ғалабасиз сериямизга бир нечта сабаблар бор. Биз комбинацион ўйин намойиш этишга ҳаракат қиляпмиз ва ҳали жамоа ўзининг энг яхши формасига кириб олмади. Мавсум олдидан 10-12 нафар янги футболчи олгандик. Ҳужумдаги ишларимиз ҳам юришмаяпти. Шунингдек, 6 ўйинимиздан 5тасини ёмон майдон ва ёмон шароитларда ўтказдик. Шу боис ўзимиз хоҳлаган комбинацион ўйинни кўрсата олмадик. Мен ўзимдан масъулиятни соқиб қилмайман. Ҳар қандай ҳолатда ҳам масъулиятни ўз зиммамизга оламан. Иккинчи даврада вазиятни ўнглашимиз керак. Мен футболчиларга ишонаман. Қийин вазиятдан чиқиб кетамиз деган умиддаман.

— “Андижон” ўйинида мураббийнинг қўли кўринмаётгандек...
— Битта ўйиндан хулоса қилиш яхшимас. Ҳа, бугун ўйинимиз чиқмади, лекин бу дегани биз ҳамма ўйинларда шундай ўйин кўрсатяпмиз дегани эмас. Масалан, “Динамо” билан ўйинда энг яхши ўйинимизни кўрсатдик. Фақат ўйин тугашига 8 дақиқа қолганида ўз дарвозамиздан 2та гол ўтказиб юбориб, мағлубиятга учрадик.

— Сизни туғилган кунингиз билан табриклайман. Футболчилар сизга совға тайёрлашдими?
— Кеча машғулотда менга совға топширишди. Аммо мен уларга айтдимки, агар “Локомотив” билан учрашувда яхши ўйин кўрсатсангизлар, мана шу мен учун энг яхши совға бўлади, деб айтдим. Аммо улар бугун умидимни оқлашмади.