Жанубий Кореянинг футбол янгиликларидан бохабар этувчи интернет нашрлари шундай сўзларни сарлавҳа қилиб келтиришмоқда. Гап собиқ мураббий томонидан "Футболчи эмас", дея назарга илинмаган Ўзбекистон терма жамоаси сардори ва “Сеонгнам” аъзоси Сервер Жепаров ҳақидадир.
Дарҳақиқат, бугун бўлиб ўтган кей-лига 11-тур доирасидаги “Сеонгнам” – “Поханг Стилерс” ўйинида терма жамоамиз сардори собиқ мураббий ўзи ҳақида хато фикрлаганини исботлай олди. Ўйинда ташаббусга эга бўлган сеонгнамликлар 17-дақиқадаёқ ҳисобни очишди. Ким Донг Хи ишлаган пенальтини Сервер дарвозага аниқ йўллади.
34-дақиқага келиб энди ҳакам “Сеонгнам” дарвозаси сари пенальти белгилади. Аммо сеонгнамликлар дарвозабони Парк Жун Хёк ўз жамоасини голдан қутқариб қолди. Шундай бўлса-да похангликлар 73-дақиқада ҳисобни барибир тенглаштиришди.
Бу якуний ҳисоб эмас эди. 76-дақиқада Жонг Сон Хо ва 90-дақиқада Ким Те Хван “Сеонгнам”нинг ишончли ғалабасини таъминлашди. Ўйин давомида Сервер Жепаровнинг майдон маказидаги етакчилиги яққол кўзга ташланди. Унинг бурчак тўпларидан амалга оширган зарбалари хавфли вазиятларни вужудга келтирди. Шундай қилиб, “Сеонгнам” чемпионатдаги бир неча ўйиндан иборат муваффақиятсизликка нуқта қўйди ва кей-лигада 1-ўринни эгаллаб турган "пўлатчилар"ни доғда қолдирди.
Бугун шунингдек турнинг қолган ўйинларида “Ульсан” ўз майдонида “Жежу Юнайтед” билан 1:1 ҳисобида дуранг ўйнаган бўлса, “Сувон” – “Чонбук” баҳсида 1:0 ҳисоби қайд этилди.
Отабeк Йўлдошeв
Жанубий Корeя, Сeул
