Футзал бўйича Ўзбекистон миллий терма жамоаси Японияни мағлуб этганидан кейин сўнгги турда ҳам Корея устидан ғалаба қозонса, ўз гуруҳида 1-ўринни эгаллаб, плей-оффга чиқиши мумкин. Баҳодир Аҳмедов Японияга қарши ўйиндан кейин ва Жанубия Кореяга қарши ўйиндан олдин ўз фикрларини билдириб ўтди.

Баҳодир Аҳмедов, Ўзбекистон миллий терма жамоаси бош мураббийи:
— Япония каби кучли терма жамоа устидан ғалаба қозониш ёқимли. Лекин бу ўз мақсадимиз сари ташланган дастлабки қадам ҳисобланади. Омад кулиб боқмаса футзалда ҳам, футболда ҳам ғалаба қозониб бўлмайди. Албатта, бизга омад кулиб боқди. Ҳисоб 5:0, 10:0 ёки 2:1 бўлса ҳам 3 очко берилади. Бу биз учун муҳим.

Биз Кореяни ҳурмат қиламиз. Уларга қарши жуда кўп маротаба ўйнаганмиз. Улар ҳамиша ўз характерларини кўрсатишади. Корея дастлабки иккита ўйинда мағлубиятга учраганига қарамай, улар бизни мағлуб этишга ҳаракат қилишади. Биз ўз гуруҳимизда 1-ўринни эгаллаб, плей-оффга чиқишимизни истаймиз. Ўйин қийин бўлади.

Рауль Эскудеро, Жанубий Корея терма жамоаси бош мураббийи:
— Ўзбекистонга қарши ўйинда ҳам ўз услубимизда ҳаракат қиламиз. Бу ўйинда ўз ўйинимизни янада такомиллаштиришга уринамиз.