Ўзбекистон кубоги 1/8 финали "Навбаҳор" – "Истиқлол" учрашувдан сўнг (1:0) "Навбаҳор" бош мураббийи Бахтиёр Ашурматов журналистларнинг саволларига жавоб берди.

Бахтиёр Ашурматов («Навбаҳор» жамоаси бош мураббийи):

- Ўйин ҳақида нима дейиш мумкин. «Истиқлол» жамоасининг олдинги ўйинларини кўргандим. Улар сафида яхши савияли биринчи лигада тобланган футболчилар жой олишган. Рақиб сафидаги исталган футболчи олий лигада ҳам ўзини кўрсатиши мумкин. Меҳмонларни ҳимоявий тактикани танлашларини ҳам билардим. Шундан келиб чиққан ҳолда йигитларга биринчи лига жамоасини осонлик билан мағлубиятга учратамиз деб ўйламасликларини уқтиргандим.

Шундай бўлсада, футболчиларимиз осон ғалабани кўзлаган ҳолда тўп суришди. Биринчи бўлимда рақиблар асосий эътиборни ҳимояга қаратишгани боис ҳужумлар ташкил этиш борасида қийинчиликларга дуч келдик. Ўйинни ташкил этишдаги камчиликлар туфайли хавфли вазиятлар сони у қадар кўп бўлмади.

Иккинчи бўлимда уч ҳимоячи билан тўп суриб, ҳужумчилар сонини оширдик. Шундай бўлсада, ҳужумлар ташкил этиш осон бўлмади. Учрашув охирларида гол уришга эришиб, мухлисларимизни қайсидир маънода хурсанд қилишни уддасидан чиқдик. Кейинги босқич чиқиш масаласи жавоб учрашувига қолдирилди. Сафардаги баҳсда қўлга киритилган натижани мустаҳкамлашимиз ва кейинги босқичга чиқишимиз керак.