“Навбаҳор” – “Андижон” учрашувидан сўнг ўтказилган матбуот анжуманида ҳар икки жамоа бош мураббийлари ОАВ вакилларининг саволларига жавоб қайтаришди.

Бахтиёр Ашурматов (“Навбаҳор” жамоаси бош мураббийи):
— Бугунги дерби бўлганлиги боис икки ҳисса катта куч билан ҳозирлик кўргандик. Учрашувдан олдин футболчиларга бор куч маҳоратларини ишга солган ҳолда ҳаракат қилишларини талаб қилгандик. Негаки, мухлисларимиз бошқа жамоаларга қарши ўйинларда очко йўқотишимизни кечиришлари мумкин. Аммо, “водий дерби”сидаги баҳсда очко йўқотилишини кечирмасликларини айтиб ўтгандим. Бу орқали мавсум бошида тўпланган барча обрўимизни йўқотиб қўйишимиз мумкинлигини уқтиргандим. Айнан шундан келиб чиққан ҳолда йигитлар зиммаларидаги масъулиятни ҳис қилган ҳолда катта иштиёқ билан ҳаракат қилишди. Жиддийроқ тайёрланганимиз боисми ёки бошқа сабабми учрашув бошида йигитларда хаёжон сезилиб турди. Бу эса оддий вазиятларда ҳам тўпни йўқотилишига олиб келди. Биринчи голни урганимиздан кейин футболчиларда ўзларига бўлган ишонч ортди. Натижада мухлислар ва клуб раҳбариятига ажойиб ғалабани тақдим этдик. Ушбу ютуқ билан билан барча жамоамиз мухлислари ва раҳбарларини табриклайман. Шу билан бир қаторда ўйинда майдонга тушган ёки захирада ўтирган футболчиларимизга таъзим қиламан ва уларга миннатдорчилик билдираман. Йигитларимиз билан фахрланаман.