"Андижон" ва "Насаф" жамоалари ўртасидаги учрашувдан сўнг ўтказилган матбуот анжуманининг биринчи қисмида меҳбонлар бош мураббийи Рўзиқул Бердиев иштирок этиб жамоасининг ўйини ҳақида қуйидаги фикрларни билдирди.
- Бугун ўйин қайсидир жамоанинг устунлиги ўтди дейиш нотўғри. Менинг назаримда, ўйин тенг бўлди. Муҳими, керакли уч очкони қўлга киритдик ва бунга футболчиларимни маҳорати эвазига эришдик деб ўйлайман. Яна шуни ҳам айтиб ўтишим керакки, “Бунёдкор” билан бўлган ўйинда шогирдларим кўп куч сарфлашгани бугунги баҳсда кўриниб турди. Чунки йигитларда эркин ҳаракат қилиш сезилмади. Асосийси, ғалабага эриша олдик.
“Андижон” билан бундан бир неча кун олдин кубок баҳсида куч синашгандик ва бу жамоанинг имкониятини яхши билардик. Ана шунга мос равишда ўйин ташкил қилиб ғалаба қозондик. Бу билан биз учун жуда муҳим очко деб ўйлайман ҳамда бундан албатта хурсандмиз.
Аввалги беллашув кубок учрашуви эди. Бугунги баҳсда эса “Андижон”га очко жуда кераклигини билгандик. Биз шунга яраша тайёргарлик кўргандик. Албатта, олдинги ўйинга қараганда катта фарқ қилди дея олмайман.
Лекин андижонликлар бугун ғалабани кўпроқ хоҳлашганди ва уларда иштиёқ юқори эди. Жамоанинг руҳий тайёргарлиги яхши бўлгани учун охиригача кураш олиб борди. Мезбонларда ҳам гол уриш учун вазиятлар бўлди.
