23 май куни Терма жамоалар маркази вакиллари Фарғонада меҳмон бўлишди. Бундан мақсад Темур Алимхўжаев бошчилигидаги Ўзбекистон ўсмирлар терма жамоасига янги номзодларни танлаб олиш эди. Фарғона ва Андижондан келган 1998 йилда туғилган футболчилардан иборат терма жамоалар ўйини ташкил этилди. Фарғона давлат университети стадионида (олдинги “Фарғона”) бўлиб ўтган ўйинда фарғоналик ўсмирлар 7:1 ҳисобида ғалаба қозонишди.

Шу куни Терма жамоалар маркази селекционерлар мураббийи Вячеслав Солохо ва Ўзбекистон ўсмирлар терма жамоаси мураббийлари ёш футболчилар ўйинини кўзатиб боришди.

— Бу ўйинни ташкил этишдан мақсад, Ўзбекистон ўсмирлар терма жамоасига янги номзодларни танлаб олиш. Айни дамда Алимхўжаев жамоаси ўйини шакллантириб борилаётган бўлса-да, барибир айрим чизиқларда камчиликлар йўқ эмас. Шунинг учун вилоятларда мана шундай ўйинларни ташкил этдик. Кейинги сафаримиз Самарқандда бўлади, — дейди Солохо.

— Вилоятларда иқтидорли футболчиларимиз жуда кўп. Уларни излаб топишимиз даркор. Ўсмирлар терма жамоаси сафи қанчалик кенгайса, футболимиз савияси шунчалик ошиб боради. Мана бугун ҳар икки жамоа сафида ҳам ёш иқтидор эгалари борлиги ойдинлашди, —дейди Ўзбекистон ўсмирлар терма жамоаси ёрдамчи мураббийларидан бири Миразиз Мирзааҳмедов.

— Ўсмирлар терма жамоаси эшиги ҳамма учун очиқ. Биз бундан олдин Тошкент шаҳри ва вилояти терма жамоалари ўртасида худди шундай учрашув ташкил этгандик ва бир неча футболчиларни танлаб олгандик. Энди мана шундай тадбир Самарқандда ўтказилади. У ерда Самарқанд, Бухоро ва Хоразм терма жамоалари тўпланишади. Бугунги ўйинда бизга манзур бўлган футболчилар терма жамоамизнинг кейинги ойда бўлиб ўтадиган йиғинида иштирок этишади, — деб қўшимча қилди Ўзбекистон ўсмирлар терма жамоаси ёрдамчи мураббийи Олимжон Шокиров.

«Футбол инфо» газетаси