Наманган шаҳрида ўрта махсус, касб-ҳунар таълими муассасалари ўқувчилари ўртасида ўтказиладиган «Баркамол авлод — 2014» спорт мусобақалари машъаласи 29 май, пайшанба куни вилоятнинг Чуст шаҳрига кириб келди. Бу ҳақда Ўзбекистон Миллий олимпия қўмитаси матбуот хизмати хабар берди.

Машъалани ҳар жабҳада фаол, спортчи ёшлар Мавлоно Лутфуллоҳ номидаги Маданият ва истироҳат боғига олиб келишди. «Бу ерда уларни давлат ва нодавлат ташкилотлар мутасадди ходимлари, нуроний отахонлар ва онахонлар, «Камолот» ёшлар ижтимоий ҳаракати фаол ёшлари, вилоятдаги касб-ҳунар коллежлари, академик лицей ва мактаб ўқувчилари, кенг жамоатчилик вакиллари тантана билан кутиб олди», – дейилади МОҚ хабарида.

Бир қатор вилоят терма жамоаларини кутиб олиш маросимлари давом этмоқда. Хусусан, Наманган халқаро аэропортида Андижон ва Фарғона, Қорақалпоғистон ва Хоразм жамоалари кутиб олинган.

Маълумот учун, 29 май кунининг ўзида футбол, волейбол, баскетбол, бокс бўйича мусобақалар ҳам бошланиб, дастлабки босқичларнинг ғолиблари номи ҳам маълум бўлиб улгурди.

Қайд этиш жоиз, мусобақанинг тантанали очилиш маросими 29 май, пайшанба куни Наманган шаҳридаги «Навбаҳор» марказий стадионида бўлиб ўтади.