1 июнь куни "Пахтакор" Қаршида "Насаф" билан майдонга тушади.

Олий лиганинг 10-туридан ўрин олган марказий беллашувда жамоамиз Қаршига сафар қилади. "Насаф" айни пайтда 20 очко билан 3-поғонада бормоқда. Егор Кримец сариқ карточкалари сони 4тага етгани сабабли ўйинни ўтказиб юборади. Мезбонлар сафида бундай йўқотиш мавжуд эмас.
 
Ҳозирга қадар жамоалар олий лигада 34 бор тўқнаш келган. Уларнинг 19тасида "Пахтакор", 7тасида "Насаф" зафар қучган. 8 баҳс дуранг билан тугаган. Жамоамиз 48 бор, қаршиликлар 26 марта дарвозани ишғол этган. Ўтган йили Тошкентда Козакнинг ягона голи "шерлар"га ғалаба келтирганди. Қаршида эса Мақсуд Каримов ва Шарофетдинов киритган тўплар учрашувнинг 1:1 ҳисобида якунланишини таъминлаган. Сафардаги ўйинларда жамоамиз 5 ғалаба, 6 дуранг ва 6 мағлубиятга эга. "Насаф" ўз майдонида охирги бор 2006 йил муваффақиятга эришган. Ундан кейин ўтказилган 7 беллашувнинг 3тасида "Пахтакор" ютган, қолган 4 ўйин дуранг натижа билан ниҳоясига етган.
 
Ўйинни Рустам Бобомуродов бошчилигидаги ҳакамлар гуруҳи бошқаради. У бу мавсумда Қўқонда ўтган кубок баҳсида жамоамиз иштирокидаги беллашувни бошқарганди. Ўшанда 0:0 ҳисоби қайд этилган.

"Насаф" - "Пахтакор" учрашуви 1 июнь, шанба куни Қаршидаги "Насаф" стадионида соат 19:00да бошланади. "Пахтакор" мухлисларини муҳим баҳсда жамоани қўллаб-қувватлашга чақирамиз.
 
"НАСАФ" - "ПАХТАКОР"
Ҳакамлар: Рустам Бобомуродов (Навоий), Руслан Самандаров (Навоий), Обид Жумаев (Навоий), Вилоят Нажафалиев (Тошкент).
Назоратчи: Вячеслав Валицкий (Тошкент).