Темур Олимхўжаев бош мураббийлигидаги Ўзбекистон U-16 ўсмирлар терма жамоаси «Каспий Кубоги турниридаги илк ўйинда Қозоғистон U-17 ўсмирлар терма жамоасини йирик - 8:1 ҳисобида мағлубиятга учратди.
1998 ва ундан кейинги йилларда туғилган Ўзбекистон U-16 ўсмирлар терма жамоаси ҳар йили анъанавий тарзда ўтказиладиган «Каспий Кубоги мусобақасида иштирок этиш учун 29 май куни Озарбайжон пойтахти Боку шаҳрига жўнаб кетган эди.
Темур Олимхўжаев шогирдлари турнирнинг илк ўйинини 30 май куни Қозоғистон U-17 ўсмирлар терма жамоасига қарши ўтказиб, йирик 8:1 ҳисобида ғалаба қозонишди. Турнирнинг иккинчи ўйинида Ўзбекистон ўсмирлари Туркия U-17 ўсмирларига қарши майдонга тушади. Мазкур ўйин 1 июнь куни ўтказилади.
Таъкидлаш лозим, мусобақада жами 12 терма жамоа иштирок этиб, уларнинг аксариятини 17 ёшгача бўлган ўсмирлар терма жамоалари ташкил этади. Фақат Ўзбекистон ва Озарбайжон терма жамоалари мусобақада 16 ёшгача бўлган ўсмирлар термаси билан иштирок этади.
«Каспий Кубоги» Ўзбекистон U-16 ўсмирлар терма жамоасининг сентябрь ойида Таиландда ташкил этилиши кутилаётган Осиё чемпионатига тайёргарлигининг бир қисмидир. Ўзбекистон U-16 ўсмирлар терма жамоаси ушбу мусобақа финал босқичи «С» гуруҳида Кувайт, Непал ва КХДР ўсмирларига қарши тўп суради.
«Каспий Кубоги», 1-тур.
Ўзбекистон U-16 – Қозоғистон U-17 - 8:1
Голлар: Ислом Кенжабоев 6, 70, Юсуф Аҳмаджонов 12, 28, Жонибек Кўчимов 17, 64, Илҳом Алижонов 21, Амин Файзуллаев 80
