ФИФА президенти Йозеф Блаттернинг таъкидлашича, футболга видеотакрорлар жорий қилиниши мумкин.

«Голни аниқлаш технологияси ўзини оқлади. Шу боис ушбу технология нафақат жаҳон чемпионати учун, балки бошқа мусобақалар ва миллий чемпионатлар учун ҳам керак. Технология ҳакамларга ёрдам беради. Шунинг учун мухлислар учун ҳам фойдали. Энди гол бўлгани ёки бўлмагани борасидаги баҳслар юзага келмайди.

Профессионал футбол лигалари ушбу янгиликка қўл уришига ишончим комил. Мен УЕФА президенти Мишель Платини билан гаплашдим. У мазкур технологияни ЕВРО-2016дан бошлаб жорий қилмоқчи.

Биз ҳакамларга янада кўпроқ ёрдам беришимиз ва футболнинг ҳалол бўлишини таъминлашимиз шарт. Биз мураббийларга бир бўлим давомида 2 марта видеотакрор сўраш имкониятини бермоқчимиз. Табиийки, ушбу имконият ўйин тўхтаган вазиятда тақдим этилади. Албатта, бунга офсайдлар кирмайди. Боиси, бундай вазиятларни қайтадан ўйнаб бўлмайди.

Пенальти ва фолни аниқлаш борасида вазиятни қайта кўриш мумкин. Бунда мураббий ҳакам билан бирга мониторнинг олдига боради.

ЖЧ-2010да Лэмпарднинг зарбаси гол бўлгани ёки бўлмагани ҳақида баҳсли вазият биздан голни аниқлаш технологиясини жорий қилишни талаб қилди. Энди биз олдинга яна бир қадам ташладик. Мураббийлар ҳакамнинг қарори билан баҳслашиш имкониятига эга бўладилар», — дейди Блаттер.