Коста Рика терма жамоаси бош мураббийи Хорхе Луис Пинто Голландияга қарши ўйинда Роббеннинг симуляцияларидан хавотирда эканини таъкидлаб, ўйинни бошқариб борадиган ҳакамларга бундан эҳтиёт бўлиш кераклигини таъкидлади.

Эслатиб ўтамиз, Коста-Рика ва Голландия терма жамоалари ўртасидаги ўйинни ўзбекистонлик ҳакам Равшан Эрматов бошқариб боради.

"Ушбу чемпионатда пенальти ишлашга бўлган уринишлар мени кўпроқ хавотирга солмоқда. ФИФА ва ҳакамлар Роббенга нисбатан хушёр бўлишларини истардим. Унинг йиқилишлари бизни хавотирга солмоқда. Ҳа, у Мексикага қарши ўйиндан кейин симуляция ишлатганини тан олди. Энди ҳакамлар унга нисбатан хушёр бўладилар деган умиддаман. Мен Роббенни ҳурмат қиламан. У жаҳондаги энг кучли уч ёки тўрт нафар футболчидан бири. Лекин унинг номига доғ тушган. Балки, ҳакам уни сариқ карточка билан жазолаши керакдир, шунда у навбатдаги симуляция орқали майдондан четлатилиши мумкинлиги ҳақида ўйлаб қолади", дейди Хорхе Луис Пинто.