Европа лигаси, 2-саралаш босқичи доирасида Россиянинг "Краснодар" клуби Эстониянинг "Силламяэ Калев" жамоасини қабул қилди ва бу сафар ҳам йирик ҳисобда ғалаба қозонди.

Ўзбекистонлик футболчи Одил Аҳмедов краснодарликлар сафида иккинчи бўлимдан бошлаб ўйинни давом эттирди. Биринчи бўлимда россияликлар ягона гол эвазига олдинга чиқиб олишди. Иккинчи бўлимда эса мезбонлар рақиб дарвозасига яна 4та тўп йўллашд.

"Краснодар"нинг учинчи голига Одил Аҳмедов ассистентлик қилди. Унинг узатмасидан кейин Вандерсон дарвозабон билан  бирга-бир вазиятга чиқиб борди ва дарвозани ишғол қилди. Ўйиннинг 83-дақиқасида ҳамюртимизнинг ўзи гол муаллифига айланиши мумкин эди. Яна бир Ўзбекистонда туғилган Марковнинг узатмасидан кейин Аҳмедов 11 метрли нуқта атрофидан дарвозага зарба берди. Эстонияликлар дарвозабони Стародубцев хавфни бартараф этди.

Эслатиб ўтамиз, Эстонияда бўлиб ўтган дастлабки ўйинда "Краснодар" йирик 4:0 ҳисобида ғалаба қозонганди.

Одил Аҳмедов жамоадошлари 3-саралаш босқичида Литекс (Болгария) - Дишодьор (Венгрия) жуфтлиги ғолибига қарши баҳс олиб боради.

Европа лигаси, 2-саралаш босқичи, жавоб ўйини
"Краснодар" (Россия) – "Силламяэ Калев" (Эстония) - 5:0 (1:0)
Голлар: 1:0 – 28 Жоаозиньо, 2:0 – 65 Лаборде, 3:0 – 67 Вандерсон, 4:0 – 74, пенальти Вандерсон, 5:0 – 76 Бурмистров.
Краснодар – Дикань, Газинский (Одил Аҳмедов, 46), Сигурдссон, Мартынович, Перейра, Померко, Петров, Жоаозиньо (Лаборде, 57), В.Быстров (Марков, 68), Бурмистров, Вандерсон.
Силламяэ Калев – Стародубцев, Чеминава, Сидоренков, Дударев, Багужис, Силич (Квасов, 72), Внуков (Ратников, 70), Машичев (Новиков, 84), Тяпкин, Кабаев, Мурихин.
Огоҳлантириш: Дударев (73).