Мадриднинг «Реал» футбол клуби «Монако»нинг колумбиялик футболчиси Радамель Фалькаонинг ўтиши борасида келишиб олди, дея хабар бермоқда ABC.es.

Хабар беришларича, «Реал Мадрид» колумбиялик ҳужумчини 12 миллион евро эвазига бир йилга ижарага олади ва футболчини 33 миллион евро эвазига сотиб олиш ҳуқуқини ўзида сақлаб қолади.

Ушбу ўтиш расмийлаштирилиши учун колумбиялик футболчи ёзги трансфер ойнаси ёпилгунига қадар тиззасидаги жароҳатдан қутилиб улгуриши керак.

Қайд этиш жоиз, айнан шу жароҳат сабаб Фалькао Бразилияда бўлиб ўтган 2014 йилги жаҳон чемпионати баҳсларини ўтказиб юборди.

Эътиборли томони, «Реал Мадрид» яқиндагина «Монако»дан бошқа бир колумбиялик ҳужумчи – Хамес Родригесни сотиб олганди.

ОАВ ахборотига кўра, «Реал Мадрид» ЖЧ-2014 тўпурари учун Франция чемпионатида иштирок этувчи жамоага 80 миллион евро тўлаган.