Миржалол Қосимов бош мураббийлигидаги 1991 ва ундан кейинги йилларда туғилган футболчилардан иборат Ўзбекистон миллий терма жамоаси бугун «Олмалиқ» клубига қарши йиғин давомидаги сўнгги назорат учрашувида майдонга тушади.

«Олмалиқ» клубига қарши назорат ўйини Қосимов шогирдлари учун мазкур йиғин доирасидаги сўнгги учрашув бўлади. Учрашув, «ЖАР» стадионида соат 19:00да бошланади. Эслатиб ўтамиз, 20 июль куни Тошкентга йиғинга киришган Ўзбекистон терма жамоаси бунгача 3та назорат ўйинида майдонга тушди ва уларнинг барчасида ғалаба қозонди.

Дастлаб, 22 июль куни «Навбаҳор» йирик ҳисобда мағлубиятга учратилган бўлса, 24 июль куни «Металлург» Қосимов шогирдларига рақиб бўлди ва бу ўйин ҳам Ўзбекистон терма жамоасининг ғалабаси билан якунланди - 2:1.

26 июль, шанба куни эса терма жамоа Тошкентнинг «Пахтакор» клубига қарши назорат ўйинида майдонга тушди ва йирик 6:0 ҳисобида ғалаба қозонди.

Бугун бўлиб ўтадиган «Олмалиқ» клубига қарши учрашув Миржалол Қосимов шогирдларининг Тошкент шаҳридаги йиғинига якун ясаб беради. Эслатиб ўтамиз, Миржалол Қосимов мазкур йиғинда 1991 ва ундан кейинги йилларда туғилган футболчилардан иборат жами 26 нафар футболчини синовдан ўтказади ва сентябрь ойида Инчеон шаҳрида старт оладиган Осиё Ўйинларига борадиган таркибни аниқлайди.

Назорат учрашуви.

27 июль, якшанба, «ЖАР» стадиони.

Ўзбекистон МТЖ – «Олмалиқ» (Тошкент)