Сентябрь ойида бўлиб ўтадиган Осиё ўйинларига тайёргарлик кўраётган Ўзбекистон U23 терма жамоаси Тошкентдаги йиғинни якунлади. Терма жамоамиз бугун "Жар" стадионида "Олмалиқ"қа қарши назорат учрашувини ўтказди.

Қосимов кеча бўлиб ўтган "Пахтакор"га қарши ўйинда асосий таркибдан фойдаланган бўлса, бугунга баҳсда қолган футболчилар ўйин амалиётига эга бўлишди.

Биринчи бўлимнинг 36-дақиқасида "Нефтчи" ярим ҳимоячиси Павел Смоляченко "Олмалиқ" дарвозасини ишғол қилиб, терма жамоани ҳисобда олдинга олиб чиқди. Иккинчи бўлим бошида терма жамоа ҳимоячиси ва дарвозабонининг ўзаро тушунмовчигидан фойдаланган Зафар Полвонов ҳисобни тенглаштирди. Орадан кўп ўтмасдан Дилшод Жўраев яна термани ҳисобда олдинга олиб чиқди.

Қолган дақиқаларда Қосимов шогирдлари яхши ҳимояланишди ва ғалабани ушлаб қолишди.

Ўзбекистон U23 бир ҳафта давомида Олий лиганинг 4 жамоасига ("Навбаҳор", "Металлург", "Пахтакор", "Олмалиқ") қарши назорат ўйинларини ўтказди ва барчасида ғалаба қозонди.

Назорат ўйини
ЎЗБЕКИСТОН - "ОЛМАЛИҚ" - 2:1
Голлар: Павел Смоляченко (36), Дилшод Жўраев (51) — Зафар Полвонов (47)
Ўзбекистон: Муҳиддин Худоёров, Сардор Рахмонов, Акбар Исматуллаев, Шерзод Файзиев, , Сардор Собирхўжаев, Дилшод Жўраев, Фарруҳ Сайфиев, Диёр Туропов, Павел Смоляченко, Сардор Мирзаев Шаҳзод Нурматов.
Захирдан майдонга тушганлар: Абдукарим Муҳамедов, Даврон Ҳошимов, Улуғбек Дадабоев.