Ўз ичига сузиш, велопойга ва югуриш баҳсларини жамлаган триатлон спорт тури бўйича расмий мусобақаларни ўтказила бошлаганлигига бу йил 25 йил тўлади.

Бугунги кунда Халқаро триатлон иттифоқига дунёнинг 126 давлати аъзо бўлиб, спортнинг ушбу тури 2000 йили Сидней (Австралия)да ўтказилган Олимпиада ўйинлари дастурига киритилган. Бугунги кунда дунёда Англия, Янги Зеландия, Германия, АҚШ терма жамоалари, Осиёда эса Япония, Жанубий Корея, Хитой термалари пешқадам ҳисобланади.

Ўзбекистон терма жамоаси мана бир неча йилдирки Осиё қитъасида кучли ўнликдан ўрин эгаллаб келади. Мамлакатимиз терма жамоасининг бош мураббийи Леонид Блохиннинг таъкидлашича, бугунги кунда юртимизнинг барча худудларида спортнинг ушбу тури ривожланиб бораётган бўлиб, айниқса, Самарқанд, Қашқадарё, Сурхондарё ҳамда Андижон вилоятларида триатлон спорт турини оммалаштириш ва ривожлантириш ишлари яхши йўлга қўйилган. Шу боис ҳам юқорида номлари зикр этилган вилоятлар Республика миқёсидаги мусобақаларда доимо совринли ўринларга асосий даъвогар ҳисобланишади.

Айни кунларда эса Леонид Блохин бошчилигидаги беш нафар спортчимиз – булар Шоҳрух Юнусов (Андижон), Жавоҳир Юнусов (Андижон), Дмитрий Зайцев (Самарқанд), Зуҳра Воҳидова (Жиззах) ва Алина Хакимова (Навоий) жорий йилнинг 19 сентябрь – 4 октябрь кунлари Жанубий Кореянинг Инчеон шаҳрида ўтказиладиган XVII ёзги Осиё ўйинларига қизғин ҳозирлик кўришмоқда.

“29 июлдан – 7 августга қадар Тошкент вилоятида ўқув-йиғин машғулотлари ташкил этилган. Шундан сўнг, спортчилар 8-10 август кунлари ўтказиладиган Ўзбекистон кубогининг ҳал қилувчи финал босқичи мусобақаларида ўз маҳоратларини тоблашади. Мазкур мусобақанинг шахсий ҳисобдаги баҳсларида спортчилар 1500 метрга сузиш, 40 км. масофага волопойга ҳамда 10 км. масофага югуриш баҳсларида иштирок этсалар, микст (эркак-аёл) баҳсларида юқорида қўрсатилган масофалар икки баробарига қисқаради. Шу ўринда таъкидлаш жоизки, Республика миқёсида ўтадиган мусобақалар йилдан-йилга муросасиз курашлар остида ўтяпти ва бу ўз навбатида Осиё ўйинларига борадиган спортчиларимиз учун айни муддао. Сўнгги ўқув-машғулот йиғинларини 15 августдан – 2 сентябрга қадар ташкил этишни режалаштирганмиз. Мақсад, Осиё ўйинларида иштирок этадиган терма жамоани бўлажак мусобақаларга ҳар томонлама пуҳта тайёрлаш ва қитъанинг энг кучли спортчилари иштирокида ўтадиган мусобақада совринли ўринлар учун кураш олиб бориш”, - дейди Леонид Блохин.

Маълумот учун. Триатлон спорт тури бўйича жаҳон чемпионати баҳслари ҳар йили 7 та босқич ва ҳал қилувчи финал мусобақалари асосида ўтказилади. Худди шундай кўринишда Жаҳон кубоги мусобақалари ҳам ташкил этилади. Осиё чемпионати эса 15 босқичдан иборат бўлиб, мазкур мусобақаларда спортчилар рейтинг очколарини тўплаб борадилар. Якунда тўрт йил давомида жамғариб борилган очколар сарҳисоб қилинади ва энг кучли ҳисобланган 55 нафардан эркак ва аёллар Олимпиада ўйинлари йўлланмасига эга бўладилар. Қоидага кўра, Олимпиада ўйинларининг йўлланмасига ҳар бир давлатдан кўпи билан икки нафар спортчи эгалик қилиши мумкин. Ўзбекистонлик Иван Морозов 2008 йилги Пекин Олимпиада ўйинларининг йўлланмасини қўлга киритиши учун жуда яқин келган. Яна бир жиҳат. Спортнинг ушбу тури билан 10 ёшдан бошлаб шуғулланиш мумкин. Мутахассисларнинг таъкидлашларича, халқаро миқёсдаги мусобақаларда 75 ёшли фахрийлар ҳам совринли ўринларни эгаллашга муваффақ бўлишган экан. Бу эса триатлон спорт турида спортчиларнинг ёши чегараланмаганлигидан далолат беради.