Англиянинг «Манчестер Сити» клуби бош мураббийи Мануэль Пеллегрини ҳамкасби Арсен Венгарнинг айбловларига қарши чиқди.

Эслатиб ўтамиз, «Арсенал» бош мураббийи Арсен Венгер «Манчестер Сити» Френк Лемпардни ўз сафига қўшиб олиш пайтида молиявий фэйр-плей қоидаларини четлаб ўтган деган фикрни билдирган эди. Ўз навбатида, Пеллегрини Венгернинг бу сўзларига жавобан барчаси қонунан ҳал қилингани таъкидлади.

«Ўйлашимча, барча трансфер масалалар амалда бўлган қонун ва қоидалар доирасида амалга оширилган. Унинг «Нью-Йорк Сити» дан сафимизга келиб қўшилгани учун биз бир фунт ҳам пул сарфламадик. Биз молиявий фэйр-плей қоидаларини четлаб ўта олмаймиз, шунинг учун ҳам трансфер пайтида керагидан ортиқ маблағ ишлата олмаймиз», - дейди Пеллегрини.

«Биз, мураббийларнинг клубда шундоқ ҳам қиладиган ишларимиз керагидан кўп. Клубга доир муаммоларимиз ҳам етарлича. Бошқа жамоаларни муҳокама қилишга бизда вақт йўқ. Ҳайронман, Венгер бунга қандай вақт топаяпти. Умуман олганда, Венгер бошқа жамоаларни муҳоакама қилишни тўхтатса бўларди», - дейди чилилик мутахассис.

Шунингдек, «Манчестер Сити» бош мураббийи Лемпардни сотқинликда айблаётган «Челси» мухлисларини ҳам тушунмаётганини айтиб ўтди.

«Мен «Челси» мухлисларини тушунмаяпман. Лемпард ҳурматга лойиқ ва профессионал футболчи. Гап шундаки, у «Челси» билан шартномани узайтиришдан бош тортмаган. Шунчаки унинг ўзи клубга керак бўлмай қолди», дейди Пеллегрини Sky Sports нашрига берган интервьюсида.