"Навбаҳор" - "Бухоро" учрашувидан сўнг ташкил этилган матбуот анжуманида аввал меҳмонлар бош мураббийи журналистлар саволларига жавоб берди.

"Бугунги учрашувда футболчиларимизни иродасидан ва тартибли ўйин кўрсатганларидан қониқиш ҳосил қилдим. Албатта натижа қониқтирмади. 90 дақиқа давомида тенг таркиблар билан ўйнашни истагандик. Афсуски, баҳсни тўққиз киши билан якунлашга мажбур бўлдик. Дебютдаёқ қизил карточка олиш ва дарвозага пенальти белгиланиши вазифани қийинлаштиради. Бунинг оқибатида ўзимиз истаган услубда тўп суриш имконига эга бўлмадик. Шунга қарамай, йигитлар иродаларини намойиш этиб, мазмунли тарзда ҳаракат қилишга интилишди. Ўйлашимча, футболчиларимиз намойиш этган ўйин наманганлик мухлисларга ҳам манзур бўлди. Ҳакамнинг ўйинни бошқариши ёки футболчини четлатиши бу унинг муаммоси ёки бошқача қилиб айтганда, уни қарори. Бунга қарши биз ҳеч нарса қила олмаймиз. Баҳсни улар ўз қарашлари билан кўришади, биз эса бошқача. Жамоа камчиликда қолган бошқа футболчиларга ортиқча юклама тушади. Бундай вазиятни юзага келиши оқибатида, чарчоқ аломатлари кузатилади ва бунинг ортидан хатолар юзага келади. Шу сабабдан ҳимоячиларимизни ишончсиз ўйнашди деб айтмаган бўлардим. Мисол учун ҳисоб 1:1 бўлиб турган пайтда анча тартибли ўйин кўрсатаётгандик", - дейди Эдгар Гесс.