2014 йилнинг 5-10 август кунлари Хорватиянинг Загреб шаҳрида эркин, юнон-рум ва аёллар кураши бўйича ўсмирлар ўртасида жаҳон чемпионати баҳслари ўтказилди.

Аввал хабар қилганимиздек, мазкур жаҳон чемпионатида беш нафар спортчимиз – булар Исломжон Баҳромов (-50 кг) ва Далер Рахматов (-120 кг) эркин кураш бўйича бўлиб ўтган беллашувларда, Маҳмуджон Шавкатов (-50 кг), Сирожиддин Ҳасанов (-60 кг) ва Абдурасул Ваҳобов (-74 кг) юнон-рум кураши бўйича ўтказилган мусобақада Ватанимиз шарафини ҳимоя қилдилар.

Муросасиз курашлар остида ўтган мусобақада ҳамюртларимиздан Маҳмуджон Шавкатов финалга қадар кечган беллашувларни мағлубиятсиз ўтказиб, кумуш медаль совриндори бўлди.

Эслатиб ўтамиз, Маҳмуджон 2013 йили ўтказилган жаҳон чемпионати баҳсларида бронза медали совриндори бўлган эди. Демак, истеъдодли спортчимиз ўтган йилги натижасини яхшилашга муваффақ бўлди.

Ушбу вазн тоифасида россиялик Гасангусейн Бадрудинов олтин, Сабер Ханжани Шарестани (Эрон) ва Эмре Демиркан (Туркия) бронза медали совриндори бўлдилар.