Осиё Ўйинларининг футбол мусобақасида терма жамоалар 23 ёшгача бўлган терма жамоа билан иштирок этишидан ва таркибга яна 3 нафар ёши катта футболчини қўшиб олишидан хабарингиз бор.

Маълумотларга қараганда, Ўзбекистон терма жамоаси бош мураббийи Миржалол Қосимов Инчеонга олиб борадиган ёши 23дан катта бўлган 3 нафар футболчи номини аниқлаб олган. Демак, "Локомотив" ҳимоячиси Ислом Тўхтахўжаев, "Сеонгнам" (Жанубия Корея) ярим ҳимоячиси Сервер Жепаров ва "Аш-Шабоб" (БАА) футболчиси Азиз Ҳайдаров Осиё Ўйинларида терма жамоамизга ёрдам беришади.

Тўхтахўжаев терма жамоа билан 16-18 август кунлари Тошкентдаги йиғинда иштирок этади ва 20 август куни Озарбойжонга қарши ўртоқлик учрашуви учун Бокуга йўл олади. Жепаров ва Ҳайдаров сентябрь ойи бошида бўлиб ўтадиган Иордания ва Янги Зеландияга қарши ўртоқлик ўйинлари учун Тошкентдаги йиғинларда иштирок этиб, сўнгра Осиё Ўйинлари олдида терма жамоа сафига қўшилиши кутилмоқда. Осиё Ўйинлари 19 сентябрь куни расман очилади. Футбол мусобақаси эса 14 сентябрдан бошланади ва 3 октябрга қадар давом этади.