Ўсмирлар ўртасидаги олимпиаданинг бокс мусобақасида 75 кг.гача бўлган вазн тоифасида бронза медали учун жанг олиб борган Козимбек Мардонов имкониятни бой бериб қўйди.

Хорватиялик Лука Плантич билан баҳснинг биринчи раунди ҳамюртимизнинг устунлигида ўтди. Иккинчи раунддан кейин эса ҳисоб тенглашди. Иккинчи раунддан кейин учала ҳам дурангни қайд этиб турганли - 19:19, 19:19, 19:10. Аммо ҳал қилувчи учинчи раундда Мардонов бироз чарчаб қолди шекилли, рақибига қаршилик кўрсата олмади. Натижада учинчи раундда барча ҳакамлар хорватиялик боксчининг ғалаба қозонганини қайд этишди - 3-0 (29:28, 29:28, 29:28).

Козимбек Мардонов 3 кун ичида 3та жангда иштирок этишига тўғри келди. У дастлаб чорак финалда финляндиялик боксчини яққол устунлик билан мағлуб этди. Ярим финалда эса украиналик спортчига кичик фарқ билан ютқазиб қўйди. Хорватиялик Лука Плантич эса баҳсларни ярим финалдан бошлади ва унда россиялик боксчига имкониятни бой берганди.

Ўзбекистонлик спортчилар ўзларининг бугунги баҳсларини якунлашди. Эртага ватандошларимиз спортнинг слалом каноэ (Артур Гулиев), аёллар кураши (Шаҳодат Жуллибаева, 52 кг.), бадиий гимнастика (умумжамоа ва индивидуал) баҳсларида иштирок этадилар.

Ўзбекистон делегация ҳисобида шу кунгача 3та олтин, 2та кумуш ва 3та бронза медаллари мавжуд. Икки нафар боксчимиз 27 август куни финалда баҳсида иштирок этишади. Шу боис, делегациямиз ҳисоби яна камида 2та медаль билан бойийди.