"Барселона" сафарда "Вильярреал" устидан қийин ғалабага эришди. Ушбу ғалабада Месси ва омаднинг ҳиссаси катта бўлди.

Ўйининг биринчи бўлимида каталонияликлар ҳудудий устунликка эришган бўлсалар-да, рақиб дарвозаси олдида голга тортадиган иккитагина вазият яратишди. Педронинг зарбасини мезбон посбони катта қийинчилик билан қайтарган бўлса, Мессининг жаримадан йўллаган зарбаси дарвоза устунига тегиб қайтди.

Дарвоқе, дарвоза устуни. Бу ўйинда тўп бир эмас, икки эмас, нақ 5 марта дарвоза устунига тегди. Шундан 3тасида "Барса"ни голдан айнан устун қутқариб қолди. Икки марта эса каталонияликларнинг зарбаси рақиб дарвозаси устунига тегди.

Ўйиндаги ягона гол 82-дақиқада Сандро Рамирес томонидан киритилди. Голли узатма Месси томонидан амалга оширилди. У ўнг қанотдан жарима майдончасига ёриб кирди ва Сандрони тўп билан таъминлади. Рамирес тўпга шунчаки оёқ қўйди холос.

Испания чемпионати, 2-тур
Вильярреал – Барселона 0:1 (0:0)
Гол: 0:1 – 82 Сандро Рамирес.
Вильярреал – Асенхо, Коста (Габриэл, 59), Марио, Мусаккьо, Руис, Тригерос, Б.Сориано, Черишев (Вьетто, 65), Пина, Кани (Эспиноса, 70), дос Сантос.
Барселона – Браво, Дани Алвес, Пике, Альба, Матье, Рафинья (Хави, 75), Бускетс, Педро (С.Рамирес, 70), Ракитич, Мунир (Неймар, 59), Месси.
Огоҳлантиришлар: Педро (37), Дани Алвес (42).