Жорий йилнинг 3-6 сентябр кунлари АҚШнинг Колорадо-Спрингс шаҳрида дзюдо кураши бўйича паралимпиячилар ўртасида Жаҳон чемпионати баҳслари ўтказилади.    Бу йилги жаҳон чемпионатининг аҳамиятли томони, унда дунёнинг энг кучли дзюдо усталари аниқланиши билан бирга, 2016 йили Рио-де-Жанейро шаҳри (Бразилия)да ўтказиладиган XV ёзги Паралимпия ўйинларининг йўлланмалари учун рейтинг очколар ҳам ўйналади.   “Жаҳон чемпионатида юзга яқин давлат вакилларининг иштирок этаётганлиги ҳам унинг мавқеи ва даражаси нечоғли юқори эканлигидан дарак беради – дейди Ўзбекистон Миллий Паралимпия ассоциацияси раисининг биринчи ўринбосари Умиджон Аҳмаджонов. Жаҳон чемпионати ғолибларига 30 рейтинг очкоси, кумуш медаль совриндорлари 20 рейтинг очко ва ниҳоят бронза медаль эгаларига 10 рейтинг очколари берилади. Агарда 2012 йили Лондон шаҳри (Буюк Британия)да ўтказилган Паралимпия ўйинларида Шариф Халиловни 22 рейтинг очкоси билан йўлланмага эга бўлганлигини инобатга олсак, жаҳон чемпионатида қўлга киритиладиган 30 ёки 20 рейтинг очкоси навбатдаги Паралимпия ўйинлари йўлланмаси учун ташланган катта қадам бўлади. Кейинги рейтинг очколар жорий йил Жанубий Кореянинг Инчхон шаҳрида ўтказиладиган ПараОсиё ўйинларида ўйналади. Айни пайтда ҳар икки йирик мусобақага терма жамоамиз аъзолари масъулият ҳиссини тўлиқ англаган ҳолда ўта жиддий тайёргарлик кўрдилар. Бир неча босқичда ташкил этилган ўқув-машғулот йиғинларида терма жамоамиз учун зарур барча шарт-шароитлар яратиб берилди. Умид қиламизки, спортчиларимиз ҳар икки нуфузли мусобақада ҳам ўзларига билдирилган ишончни аъло даражада оқлайдилар”.    АҚШда ўтказиладиган жаҳон чемпионати баҳсларида Ватанимиз шарафини 15 нафар спортчимиз ҳимоя қиладилар. Улар орасида Паралимпия ўйинлари кумуш медаль совриндори Шариф Халилов, шунингдек, қатор йирик мусобақаларнинг ғолиб ва совриндорлари ҳам ўрин эгаллашган.    Ўз олдиларига доимо юқори мақсадларни қўядиган паралимпиячиларимизга бўлажак жаҳон чемпионатида ҳам омад ва зафарлар тилаб қоламиз.