Ўзбекистон - Иордания ўртоқлик учрашувидан сўнг ўтказилган матбуот анжуманида Миржалол Қосимов иштирок этди.
— Бугунги ўртоқлик ўйини, кеча айтиб ўтганимдек, Осиё Ўйинлари олдидан керакли ўйин эди. Ўйлайманки, ўйинимиз ёмон чиқмади, футболчилар ҳар иккала бўлимда яхши ҳаракат қилишди. Бугун яратилган имкониятлардан фойдалана олдик. Расмий мусобақа олдидан бугунги ғалаба йигитларга руҳий қувват беради. Ўйинлар давомида хатолар бўлди, бусиз иложи йўқ. Бу хатолар устида ишлаймиз. Иккала бўлимда икки хил ўйин қилдик. Иккинчи бўлимда гол уриб олганимиздан кейин футболчилар қарши ҳужумда ўйнашга ўтиб олишди. Қолаверса, ўртоқлик ўйини бўлгани учун иккинчи таймда тактикага ҳам ўзгартириш киритдик. Ҳисобни ушлаб қолишни ўйлаб, футболчилар рақибга ташаббусни бериб қўйишди. Шунга қарамай, ёмон ўйин бўлмади. Асосий мақсадимиз Осиё Ўйинларида яхши иштирок этишдан иборат. Бугунги ўйиндан кейин "Пахтакор"нинг 7 нафар футболчисига рухсат берамиз. Қолган ўйинчилар билан эса Янги Зеландияга қарши ўйинга тайёргарликни давом эттирамиз.
— Биринчи бўлимда ҳам терма жамоамизда имкониятлар бўлди, аммо футболчилар улардан фойдалана олишмади...
— Албатта, биринчи бўлимда бизда имкониятлар бўлди. Фарҳод яхши вазиятни кўкка совурди, шунингдек Сардорда ҳам. Марказда Козак, Искандаров ва Мусаев марказда бир-бирларини тушунган ҳолда яхши ўйнашди ва ўйин улар орқали ташкил этилди. Уларга ҳам имкон бўлганда олдинга ўтишни ва дарвозага зарба беришни сўрагандим.
— Ўзбекистон терма жамоаси дарвоза томон дастлабки зарбани 18-дақиқада берди. Барса Рашидовга ўйнади. Аввалдан бу нарса режалаштирилган эдими?
— Адашмасам, Аргентина-Голландия ўйинида дастлабки зарба 90-дақиқада берилганди. Футболчиларга ҳамиша имкон бўлганда зарба бериш кераклигини таъкидлаймиз. Баъзида рақиб зарба беришга имкон бермайди.
— Фарҳод Тожиев ва Воҳид Шодиевдан қайси бирини Осиё Ўйинларига олиб боришни Иорданияга қарши ўйиндан кейин айтаман дегандингиз.
— Ҳали бир қарорга келмадим. 8 сентябрда бўладиган Янги Зеландияга қарши ўйиндан кейин якуний қарорга келаман.
— Дилшод Жўраев "Бунёдкор"да жуда кам ўйин амалиётига эга бўлмоқда. Бу ҳақда Сергей Лушан билан суҳбатлашдингизми?
— Ҳар бир мураббийнинг ўз услуби бор. Дилшоднинг ўзи билан ҳам гаплашдим. Футболчи машғулотда қандай ишлаётганини мураббий яхши билади. Албатта, Дилшоднинг майдонга тушмаётгани футболчининг ўзи учун яхши ҳолат эмас. Ўйинчи машғулотда иштирок этсаю, ўйинда қатнашмаса, бу футболчига таътимайди. Осиё Ўйинларида унга кўпроқ ўйин амалиёти беришга ҳаракат қиламиз.
— Бугунги ўйинда майдонга тушган футболчилардан қайси бирлари Янги Зеландия билан ўйинда майдонга тушиши мумкин?
— "Пахтакор"нинг 7 нафар футболчисидан ташқари қолган футболчилар Янги Зеландия билан ўйинга тайёргарликни давом эттиради.
— Ёшартирилган таркибнинг ўйини ёмон чиқмаяпти, бугун натижа бўлди. Терма жамоа таркибини бирданига тўлиқ ёшартиришга қандай қарайсиз?
— Бунинг иложи йўқ. Буни шошма-шошарлик билан эмас, аста-секинлик билан амалга ошириш керак. Агар олдимизда 3-4 йил давомида ҳеч қандай мусобақалар бўлмаса, шундай қилсак бўларди. Катта ўйинларда тобланган ёши катта футболчилар орасида ёшлар ўз тажрибасини ошириб боришса, бу яхши бўлади. Ёшларнинг катталардан ўрганидан нарсалари кўп.
