Мамлакат чемпионатида терма жамоамизнинг ўйинлари муносабати билан юзаге келган бўшлиқни олий лига вакиллари ҳам ўртоқлик учрашувлари билан тўлдиришмоқда.  Кеча “Металлург” футболчилари Чирчиқдаги "Кимёгар" стадионида "Навбаҳор"га қарши майдонга чиқди ва ғалаба қозонди.

Август ойининг сўнгги кунларида миллий чемпионатимизнинг 18-турида куч синашган жамоалар чемпионатдаги кичик танаффусни назорат ўйини билан тўлдиришди. Дастлабки дақиқаларданоқ майдонда очиқ футбол намойиш этилди ва биринчи бўлимда водийлик футболчилар бироз устунликка эга бўлишди. Наманганликларнинг кўплаб содир этган ҳужумларини ниҳоят Шаҳбоз Эркинов гол билан якунлади. 20-дақиқада у шериклари бошлаб берган комбинацияни муваффақиятли тугатди. Бу ҳисоб биринчи таймда ўзгармай қолди.

Иккинчи бўлимда эса ташаббус Рустам Мирсодиқов шогирдлари томонида бўлди. Бекободликларнинг бу йилги мавсумдаги тўпурари Суннатилла Мамадалиев аввалига ҳисобни тенглаштирган бўлса, тезкор Шоҳназар Норбеков “Металлург”га иродали ғалабани келтирган гол муаллифига айланди. Учрашувни Олим Толибжонов бошқариб борди.

19-турда “Металлург” ўз майдонида “Насаф”га қарши майдонга чиқади. “Навбаҳор” эса шу куни Зоминда “Сўғдиёна” меҳмони бўлади.

“Металлург” – “Навбаҳор” учрашувни жамоалар қуйидаги таркибда ўтказди.
“Металлург”: Маъмур Икромов, Саидкомил Акбаров, Ҳикмат Ҳошимов, Дониёр Одилов, Алишер Зиёвуддинов, Суннатилла Мамадалиев, Муроджон Тошматов, Маъруф Муродов, Мирғиёс Сулаймонов, Зоҳид Абдуллаев.
 Захирадан майдонга тушганлар: Суҳробжон Султонов, Шоҳназар Норбеков, Нозимжон Эсонов, Жавлон Мирабдуллаев, Давронбек Каримқулов, Миртўра Акбаров.
"Навбаҳор": Дониёр Усмонов, Дилшод Жабборов, Акбар Саттаев, Илҳом Бойдедаев, Бахтиёр Ёқубов, Раҳматулло Бердимуродов, Тоҳир Шамсиддинов, Мансур Саидов, Шаҳбоз Эркинов, Бобир Акбаров, Роббим Ҳасанов.
Захирадан майдонга тушганлар: Петар Денчев, Хуршид Хўжаев, Отабек Валижонов, Абдумалик Абдуллаев, Алишер Маҳмудов, Руслан Качур, Ботир Тўрабоев, Алишер Саматов, Ғайрат Жўраев, Юрий Рижко, Элёр Жаҳонов