Бугун "Пахтакор" стадионида жамоа футболчилари ва фахрий ўйинчилар иштирокида учрашув ўтказилди.

Осиё ўйинларида юртимиз шарафини терма жамоа сафида ҳимоя қиладиган 7 нафар футболчи ҳамда клуб ходимлари ўз вақтида "Пахтакор" учун майдонга тушган ва бугунги кунда фахрийлик гаштини сураётган собиқ ўйинчилар билан ташкил этилган учрашувда қатнашди.

Клуб менежери Самвел Бабаян фахрийлар Наримон Жалолов, Тўлаган Исоқов, Аҳрол Иноятов, Равшан Юнусов, Вильгельм Қаҳҳоров ва Владимир Штерн билан биргаликда унда иштирок этди. Дастлаб Самвел Бабаян футболчиларга терма жамоа сафида майдонга тушиш шараф эканлиги ва уларга билдирилган ишончни оқлаш зарур эканлигини таъкидлаб ўтди. У Хиросимадаги муваффақиятни такрорлаш йўлида бор кучни бериш кераклиги, миллионлаб футбол мухлислари терма жамоадан ижобий натижа кутаётганини айтиб ўтди.

Шундан кейин фахрийлар навбатма-навбат сўзга чиқиб, "Пахтакор"нинг ўзбек футболида тутган ўрни аҳамиятли эканлиги, бу жамоа сафида тўп тепишганидан ҳамиша фахрга тўлишлари ва ҳозирги жамоа ажойиб ғалабаларга эришиши лозимлиги ҳақида сўзлаб ўтишди. Мамлакатимизда яратиб берилган қулай шароитларга яраша жавоб қайтариш кераклигини таъкидлашди. Яқинлашиб келаётган Осиё ўйинларида терма жамоага ва клуб футболчиларига муваффақиятлар тилашди.

"Пахтакор" футбол клуби ҳам Ўзбекистон терма жамоасига Осиё ўйинларида чиройли ғалабаларни тилаб қолади.