Россиялик профессионал боксчи Александр Поветкин WBC кумуш камарини қўлга киритди. У камерунлик Карлос Такамга қарши Москвада ташкил этилган жангда ғалаба қозонди.

Поветкин 10-раундда рақибини нокаутга учратган бўлса-да, жанг россиялик боксчи учун асло осон кечгани йўқ. WBC қонун-қоидаларига кўра, ҳар 4 раунддан кейин ҳакамларнинг баллари эълон қилиб борилади. Дастлабки раундларда ҳакамлар Такамнинг устунлигини эътироф этишаётганди. Мазкур устунлик 8 раундгача давом этди. Тўққизинчи раунд сўнгида Поветкин камерунлик боксчини нокдаунга учратди. 10-раундда эса рус боксчиси Такамни чуқур нокаутга учратди.

WBA версияси бўйича собиқ жаҳон чемпиони ҳисобланган Александр Поветкин профессионал фаолиятида 28-ғалабасини қўлга киритди (20таси нокаут билан). У бир марта — украиналик Владимир Кличкога ютқазган. Такам эса фаолиятидаги иккинчи мағлубиятини қайд этди. Унинг ҳисобида 30та ғалаба (23таси нокаут билан) ва битта дуранг бор.