Жанубий Кореянинг "Sports Dong-a" нашрига кўра, Жанубий Корея футбол ассоциацияси мамлакатда ҳакамлар савиясини ошириш ва 2018 йилги Жаҳон чемпионатида кореялик ҳакамларнинг ҳам иштирок этишига эришиш учун улкан лойиҳа ишлаб чиқмоқда. Бразилияда бўлиб ўтган Жаҳон чемпионатида Жанубий Кореядан бирорта ҳам ҳакам иштирок этмаганлиги туфайли эндиликда футбол ассоцияцияси ҳакамлар тайёрлашга жиддий киришган кўринади.

Яқинлашаётган Осиё Кубоги-2015 мусобақасига эса корейслар 6 нафар ҳакамни юбориши режага киритилган бўлиб, ОФК томонидан юқори баҳоланадиган 6 нафар ҳакамни 2018 йилги ЖЧга бориши учун барча имкониятларни ишга солишмоқчи. "Sports Dong-a" нашри бу борада куюнчаклик билан шундай ёзади: "Ҳамма масала Осиё Кубоги давомида ҳал бўлиши мумкин. Ушбу турнирда яхши фазилатларини кўрсатиб, ОФКнинг рағбатига эришиш — ҳакамларимиз учун ЖЧга йўлни очиб беради. ЖЧга эса ФИФАга ҳар бир қитъа футбол конфедерацияси тавсия этган ҳакамлар бориши кундек равшан. Корейс ҳакамлари ҳам ЖЧ остонасига қадам ташлаши учун футбол ассоцияциямиз фаоллик кўрсатиши зарур. Албатта, бизнинг ҳакамларимиз учун Ўзбекистон, Австралия, Баҳрайн ва қисман эронлик ҳакамлар асосий рақобатчи бўлиб қолаверади".

Жанубий Корея Футбол ассоцияцияси ҳакамлар бўлими раҳбари Жонг Хе Сонг эса қуйидагича фикр билдирган: "Жанубий Корея терма жамоаси Осиёда юқори натижаларга эришиб келаяпти. Аммо ҳакамларимиз борасида бундай мақтана олмаймиз. Биз ҳакамларимиз ҳам терма жамоамиз каби халқаро майдонда юксак чўққиларга чиқишлари учун дастур ишлаб чиқдик".

Отабек Йўлдошев
Жанубий Корея, Сеул