Равшан Эрматов бошчилигидаги ўзбекистонлик ҳакамлар бригадаси ноябрь ойи ўрталаридан бошлаб футбол бўйича Ҳиндистон Суперлигаси ўйинларини бошқаради. Бу ҳақда Daryo.uz хабар бермоқда.
«Равшан Эрматов жаҳоннинг энг яхши ҳакамларидан бири ҳисобланади. У ЖАРдаги жаҳон чемпионатида 5 та, Бразилияда эса 4 та ўйинни бошқарди. Бу Эрматовнинг қай даражада эканлигидан далолат беради», − деди Ҳиндистон Футбол Федерацияси вакили.
Таъкидлаш жоизки, Равшан Эрматов жаҳон чемпионатларида жами 9 та ўйинни бошқариб, бу борада рекорд қўйган. Шунигдек, у 4 марта Осиёнинг энг яхши ҳаками деб топилган.
Маълумот учун, айни вақтда Ҳиндистонда 12 октябрдан 20 декабрга қадар давом этадиган Суперлига деб номланган тижорий мусобақа ўтказилмоқда. Унда 8 жамоа иштирок этаётган бўлиб, ҳар бир клуб таркибида ўтмишнинг машҳур футболчилари тўп суради.
Хусусан, Суперлига баҳсларида Франция термаси собиқ ҳужумчилари Давид Трезеге («Пуна Сити»), Николя Анелька («Мумбай Сити»), собиқ ярим ҳимоячиси Робер Пирес («Гоа» ФК), Италия термаси ҳужумчиси Алессандро Дель Пьеро («Деҳли Динамос») каби юлдузлар тўп сурмоқда.
