Мавсумнинг энг сўнгги турида "Бунёдкор" ва "Пахтакор" жамоалари мухлисларга жуда чиройли ўйин намойиш қилиб беришди. Ишқибозлар ўйинни "Спорт" канали орқали кўришган бўлишса керак. Афсуски, шу билан чемпионатимиз якунига етиб қолди.
Ҳайрон қоласан киши, наҳотки ЎФФ ва ЎзПФЛ ҳар бир турда мана шундай тўқнашувлар, жанглар бўлишини истамайди? Нега бунинг учун ҳаракат қилмайди? Нега "актёр"лар ва "режиссёр"ларга қарши курашмайди?
Тасаввур қилинг, бугунги Тошкент дербиси чемпионлик жангига айланиши мумкин эди. Агар шундай бўлганида, чемпионатимиз йил давомида ҳақиқий курашларга бой бўлганида, ишончимиз комил, ҳашаматли "Бунёдкор" стадиони бугун мухлислар билан тўлган бўларди!
Сардор Рашидов бугунги кунда Ўзбекистоннинг энг иқтидорли футболчи эканини яна бир исботлади. Сергей Лушан эса Ўзбекистон кубогининг финал учрашуви олдидан асосий таркиб ва жамоанинг ўйин услубини жиддий синовдан ўтказиб олди. Демак, Абрамов бошчилигидаги "Локомотив"га финалда осон бўлмайди.
"Пахтакор" эса характерга эга жамоа эканини, айнан шу характери эвазига чемпион бўлганини исботлади. "Шерлар" иккита тўп фарқи билан ортда бораётиб, нафақат мағлубиятдан қутулиб қолишди, балки ғалабани ҳам ўз томонларига оғдириб олишди. Бабаян шогирдлари чемпионликни расмийлаштириб бўлганига қарамай, охиригача курашгани тахсинга лойиқ.
"Пахтакор" мавсумни мағлубиятсиз якунлади. "Бунёдкор" эса 12 ноябрь куни бўладиган Ўзбекистон кубоги финал учрашувига тайёргарлик кўради.
