«Барселона»нинг ўнг қанот ҳимоячиси Мартин Монтойя январда бошқа клубга ўтишни режалаштирмоқда.

TV3 маълумотига кўра, 23 ёшли испаниялик футболчи жамоа спорт директори Андони Субисаррета билан учрашган ва ўзини трансферга қўйишларини сўраган. «Барселона» ҳимоячини ижарага беришга ёки кейинчалик қайта сотиб олиш шарти билан бошқа клубга сотишга тайёр.

Монтойя ушбу йилда "Барса" билан шартномасини яна 4 йилга узайтирди. Аввалроқ унга «Милан», «Интер», «Рома» ва «Байер» қизиқиш билдиришганди.

Испания чемпионатининг ушбу мавсумида Монтойя «Барселона» сафида атиги битта ўйинда иштирок этди.