Россиянинг "Локомотив" клуби ва Ўзбекистон терма жамоасининг тажрибали ҳимоячиси Виталий Денисов Австралияда ўтадиган Осиё кубоги ҳақида фикрларини россиялик ҳамкасбларимизга гапириб берди.

"Гуруҳимиздан Ўзбекистон, Саудия Арабоистони, Хитой ва КХДР ўрин олган. Плей-оффга чиқиш учун яхши имкониятга эгамиз, деб ўйлайман. Мусобақанинг уч фаворити - Корея, Австралия ва амалдаги чемпион Япония терма жамоаларидир. Ўзбекистон кучли бешликка киради ва шунингдек, ғолиблик учун даъвогарлардан бири ҳамдир.

Аминманки, жамоамиз Осиё кубогида жиддий ютуқларни қўлга киритади. Орзумдаги кубокни бошим узра баланд кўтаришни жуда ҳам хоҳлаяпман.

Мусобақада жамоамизни Миржалол Қосимов бошқаради, у россиялик мухлисларга "Алания" ва "Крылья Советов" жамоаларидаги ўйинлари орқали яхши таниш.

Футболчиларга келсак, асосий ўйинчилар - ҳужумни ташкил этувчи Одил Аҳмедов ва Сервер Жепаровлардир. Шунингдек, таркибга анча яхши киришиб кетган ёшлар ҳам жалб этилган. Бу турнир олдидан биз БААда иккита йиғин ўтказамиз. Австралияга кимлар бориши ҳам ўша ерда маълум бўлади", - деди Денисов.