“Арсенал” клубининг бош мураббийи Арсен Венгер клуб эгаларидан бири бўлган Алишер Усмоновнинг танқидига жавоб қайтарди. Бу ҳақида “The Telegraph” хабар беради.
“Жамоадаги 18 йиллик иш фаолиятимда танқидларни тўғри қабул қилишни кўп бор исботлаганман. Ҳар бир одам ўз фикрига эга. Бизнинг жамоада маълум қадриятлар мавжуд. Биринчидан, жамоанинг ишлари қониқарли бўлмаган вақтларда биз бирдамлик ва ҳамжиҳатликда иш олиб борамиз. Иккинчидан, агар кимдир бошқа бир жамоа вакилидан норози бўлса, буни юзига айтиши керак”, – деди бош мураббий “The Telegraph”га берган интервьюсида.
Эслатиб ўтамиз, Алишер Усмонов Арсен Венгернинг ўз хатоларини тан олмасликда айблаган ҳамда жамоанинг ҳар бир позициясида рақобат кучли бўлиши кераклигини айтган эди.
