Шу йилнинг 3-4 декабрь кунлари Мексика пойтахти Мехико шаҳрида таэквандо ВТФ бўйича Мексика гран-при турнири бўлиб ўтди. Унда ўз вазн тоифаларида жаҳон рейтингида кучли саккизталикдан жой олган спортчилар қатнашиш имкониятига эга эдилар. Юртимиз спортчилари орасида эса фақат Жасур Бойқўзиев ушбу нуфузли гран-при турнирида қатнашиш ҳуқуқини қўлга киритганди. Мексикага Ўзбекистон спорт делегацияси терма жамоамиз бош мураббийи Александр Ким раҳбарлигида йўл олди.

Гран-при турнирида Жасур Бойқўзиев одатдагидек +80 кг. вазнда даянга чиқди ва финалгача бўлган барча жангларни ғалаба билан якунлади. Бироқ, ҳал қилувчи баҳсда ҳамюртимиз ўзининг эски таниши Жанубий Кореялик Йонг Рэ Шинга тўқнаш келди ва кичик фарқ билан 5-6 ҳисобида имкониятни бой берди.

Эслатиб ўтамиз, ушбу спортчилар бундан бироз муқаддам Инчеонда ўтказилган 17-ёзги Осиё ўйинлари ярим финалида ҳам тўқнаш келишган ва ўшанда Жасур рақибини 7-5 ҳисобида мағлубиятга учратганди. Бу сафар омад Шин томонида бўлди. Агар Бойқўзиев Мексика гран-присида ғолиб чиққанида ўз рейтингини 80 баллга бойитиши мумкин эди. Шунга қарамай кумуш медал учун тақдим этилган рейтинг баллари Жасурни 2016 йили Бразилиянинг Рио-де-Жанейро шаҳрида бўладиган 31-ёзги Олимпия ўйинлари сари яқинлаштирди.

Шу тариқа Жасур 2014 йилда ўзининг бешинчи медалини қўлга киритди. Бунгача ҳамюртимиз Тошкентда ўтган Осиё чемпионати, Жанубий Кореянинг Инчеон шаҳри мезбонлик қилган 17-ёзги Осиё ўйинлари ва Францияда бўлиб ўтган нуфузли “Париж Опен” халқаро турнирида ғалаба қозонган, шунингдек Англия ҳамда Мексида ташкил этилган олимпияда ўйинларига рейтинг баллари тақдим этувчи гран-при турнирларида кумуш медалга сазовор бўлди.
Отабек Эшмаматов