Хабарингиз бор, Ўзбекистон миллий терма жамоасига номзод футболчи саналувчи Азиз Ибрагимов 2014 йилги мавсумнинг иккинчи қисмини “Андижон” сафида ўтказди. Узоқ йиллик танаффусдан сўнг чемпионатимизга қайтган тажрибали ярим ҳимоячи андижонликлар сафида мавсумни энг яхши ўтказган футболчилардан бири бўлди. Аммо сўнгги пайтларда унинг жамоадан кетиши мумкин экани борасидаги хабарлар чиқа бошлади. Шу сабабдан вазиятга ойдинлик киритиш мақсадида футболчи билан боғландик.
“Келаси мавсумни қайси жамоада ўтказишим ҳақида аниқ бир нарса дея олмайман. Ҳозирча бутун ўй-фикрим миллий терма жамоа билан банд. Осиё Кубогига боришни хоҳлайман ва бунга қаттиқ ҳаракат қиляпман. Келажакдаги фаолиятимга эса терма жамоа йиғинидан сўнг ойдинлик киритаман. Эҳтимол, яна Чехия клубларидан бирида ўйнарман”, - дейди 28 ёшли ярим ҳимоячи.
Эслатиб ўтамиз, Азиз Ибрагимов ҳозирда Ўзбекистон миллий терма жамоасининг БААнинг Дубай шаҳридаги йиғинида иштирок этмоқда.
