"Барселона" кутилмаганда ўта муҳим 2 очкодан маҳрум бўлди. Луис Энрике шогирдлари 90 дақиқа давомида "Хетафе" дарвозага йўл топа олмадилар.

Бугунги ўйинда "кўк-анорранглилар"га кўп нарса етишмади. Руҳият, шижоат, ижодкорлик, аниқлик ва яна Неймар. Мезбонлар эса жуда яхши ҳимояланиш билан бирга ўйинда гол уриш учун 2та имкониятга эга бўлишди. Биринчи бўлимда Лафитанинг зарбасини Браво бартараф этган бўлса, ўйинга қўшиб берилган дақиқаларда Альваро дарвозабон билан бирга-бир вазиятга чиқиб бораётганида ҳакам хуштак чалиб, ўйинни якунлаб қўйди.

"Барселона" бу ўйинда ҳам дарвоза тўсинини бир марта нишонга олди. Мессининг жаримадан йўллаган зарбаси "Хетафе" бахтига тўсинга тегиб қайтди. Леонинг яна бир хавфли зарбасини дарвозабон бартараф этди.

Ушбу дурангдан кейин "Барселона"нинг очколари 35тага етди ва энди улар "Реал"дан 4 очко ортда қолишмоқда. Демак, Анчелотти шогирдлари клублар ўртасидаги ЖЧда иштирок этишига қарамай, кузгу мавсумни 1-ўринда якунлайдиган бўлди. Каталонияликлардан битта ўйин кам ўтказган "Атлетико" "Барса"дан 3 очко ортда қолмоқда.

Испания чемпионати, 15-тур
Хетафе – Барселона 0:0 (0:0)
Хетафе – Гуаита, Веласкес, Перейра, Руано, Валера, Лафита (Кастро, 70), Йода (Леон, 76), Мичел, Саммир (Васкес, 62), Сарабия, Ласен.
Барселона – Браво, Алвес (Адриано, 80), Пике, Альба, Матьё, Хави, Бускетс, Педро (Мунир, 77), Ракитич (Иньеста, 66), Суарес, Месси.
Огоҳлантиришлар: Сарабия (65), Кастро (90).