Жанубий Корея терма жамоаси яқинлашаётган Осиё Кубогидаги рақибларини чуқур ўрганишда давом этяпти. Бугун маҳаллий "Footballist" нашри эълон қилган мақолага эътибор қаратсак, корейслар чорак финалда катта эҳтимол билан Ўзбекистонга дуч келишларини тахмин қилмоқда.

"Сервер Жепаров етакчилигидаги Ўзбекистон терма жамоаси 4 йил аввалги турнирдаги кўтаринкилик ва руҳан ишончни сақлаб туришибди", деб ёзади " Footballist".

Нашр кўпроқ эътиборни собиқ Кей-лигачи Сервер Жепаровга қаратаркан, жумладан, шундай ёзади: "Кей-лигада 2014 йилги мавсумнинг бошидан то сўнггига қадар тинимсиз танқидлар остида қолган бўлса-да Сервер Жепаров 7та гол ва 3та голли узатмани амалга оширди. Ҳаттоки, футболчи учун ўта оғир руҳий зарба берадиган "Футболчи эмас", деган таъналарни ҳам эшитишга мажбур бўлди. Бу мавсумни тугатиб Ватанига кетар чоғида у бу сафарги Осиё Кубогида ҳам камида кучли тўртликка киришларини қатъий таъкидлаб кетди. Ҳозирда Сервер Жепаров ўз терма жамоаси сафида БААда тайёргарликка зўр беряпти".

Сервер Жепаровнинг Кей-лигада пайдо бўлишида муҳим рол ўйнаган футбол агенти Ким Ҳак Рёл ҳам нашрга ўз фикрларини билдириб ўтган: "Албатта, Ўзбекистон терма жамоасини тўрт йил аввалгидек жуда кучли дея олмайман. Лекин шу билан биргаликда Осиё Кубогида яққол фаворит жамоанинг йўқлиги туфайли Жепаров: "Бир ҳаракат қилиб кўрса - ўхшаб қолар", деган фикрга эга. Сервер Осиёда жуда қадрланадиган футболчилар сирасидан. Ўйинни бошқариш ва шерикларини ҳужумга бошлаб, руҳан далда беришда камёб фазилатларга эга. Умуман, Ўзбекистон терма жамоаси бу турнирда ҳам рақобатбардош жамоа сифатида гавдаланади".

"В" гуруҳида деярли тенг кучли терма жамоалар йиғилган бўлса-да Жанубий Корея футбол жамоатчилиги айнан терма жамоамизни бу гуруҳнинг фаворити деб биляпти.

Отабек Йўлдошев
Жанубий Корея, Сеул